തിരുവനന്തപുരം: ഐ എ എസ് പ്രതിഷേധം ഫലം കണ്ടില്ല.കേരള അഡ്മിനിട്രേറ്റീവ് സര്ർവ്വീസ് ശമ്പളത്തിൽ മാറ്റമില്ല.81,800 രൂപ അടിസ്ഥാന ശമ്പളമായി നിശ്ചയിച്ച് സർക്കാർ ഉത്തരവ് ഇറങ്ങി.ഒഴിവാക്കിയത് ഗ്രേഡ് പേ മാത്രം.ഗ്രേഡ് പേയ്ക്ക് പകരം പരിശീലനം തീരുമ്പോൾ 2000 രൂപ വാർഷിക ഇൻക്രിമെന്റ് നൽകും.
ശമ്പള പരിഷ്ക്കരണ കമ്മീഷൻ ശുപാർശ മറികടന്നാണ് കെ.എ.എസ്സിന് സർക്കാർ ശമ്പളം നിശ്ചയിച്ചത്. സർക്കാർ ഇപ്പോൾ നിശ്ചയിച്ച 81,800-ന് പകരം കമ്മീഷൻ നിർദ്ദേശിച്ച ശമ്പളം 63,700 ആയിരുന്നു. ഐ.എ.എസ്സുകാരെക്കാൾ കെ.എ.എസ്സിന് ശമ്പളം കൂടുമെന്ന് ഐ.എ.എസ് അസോസിയേഷൻ ഉന്നയിച്ച പരാതിയിലെ പ്രശ്നവും ശമ്പള കമ്മീഷൻ ചൂണ്ടിക്കാണിച്ചിട്ടും അത് പരിഗണിക്കാതെയാണ് സർക്കാർ ഉത്തരവിറങ്ങിയത്.
കെ.എ.എസ്സിന് സർക്കാർ നിശ്ചയിച്ച അടിസ്ഥാന ശമ്പളം 81,800 രൂപയാണ്. ഐ.എ.എസ് എൻട്രി കേഡർ സ്കെയിലായ 56,100 നെക്കാൾ കൂടുതലായതാണ് ഐ-എഎസ് ഐപിഎസ്- ഐഎഫ് എസ് അസോസിയേഷന്റെ പ്രതിഷേധത്തിന്റെ കാരണം.കെ.എ.എസ് ഉദ്യോഗസ്ഥരെ ജില്ലയിലേക്ക് നിയമിക്കുമ്പോൾ കലക്ടറെക്കാൾ കൂടുതൽ ശമ്പളം കിട്ടുമെന്ന് അസോസിയേഷൻ ചൂണ്ടിക്കാട്ടിയിട്ടും ഇതൊന്നും മുഖവിലയ്ക്കെടുക്കാതെയാണ് സർക്കാർ ഉത്തരവിറക്കിയത്. സ്പെഷ്യൽ പേ നൽകണം എന്ന ആവശ്യത്തിൽ ഉറച്ചു നിൽക്കുകയാണ് ഐ എ എസ് അസോസിയേഷൻ.
