കൊച്ചി: രാജസ്ഥാനിൽ കോൺഗ്രസ് ഇന്ന് നടത്തിയ റാലിയിൽ പങ്കെടുത്ത ഫോട്ടോ സാമൂഹ്യമാദ്ധ്യമങ്ങളിൽ പങ്കുവെച്ച കേരള നേതാക്കൾക്ക് ട്രോൾ മഴ. രാജസ്ഥാൻ സംസ്ഥാന ഘടകം സംഘടിപ്പിച്ച റാലി വിജയിപ്പിക്കാൻ കേരളത്തിൽ നിന്നടക്കം ആളുകളെ കൊണ്ടുപോയോ എന്ന് ചോദിച്ച് ഫോട്ടോ പങ്കുവെച്ച നേതാക്കളെ പരിഹസിക്കുകയാണ് സാമൂഹ്യ മാദ്ധ്യമങ്ങൾ.
ജയ്പൂരിൽ നടത്തിയ കോൺഗ്രസ് റാലിയിൽ കേരളത്തിൽ നിന്നുള്ള അഖിലേന്ത്യാ ഭാരവാഹികൾക്ക് പുറമെ എംഎൽഎമാരും ഡിസിസി ഭാരവാഹികളും പങ്കെടുത്തു. പലരും സമ്മേളനത്തിൽ പങ്കെടുക്കുന്ന ഫോട്ടോയും സോഷ്യൽമീഡിയകളിൽ പങ്കുവെച്ചിട്ടുണ്ട്. ഇത്തരത്തിൽ പങ്കുവെച്ച ചിത്രങ്ങൾക്ക് താഴെ പരിഹാസ കമന്റുകൾ നിറയുകയാണ്.
കോൺഗ്രസിന്റെ ഏറ്റവും വലിയ നേതാവ് അഭിസംബോധന ചെയ്യുന്ന റാലി വിജയിപ്പിക്കാൻ പാർട്ടി ഭരണത്തിലുള്ള രാജസ്ഥാനിൽ പോലും ആളെ കിട്ടാനില്ലെയെന്നാണ് ചിലർ ചോദിക്കുന്നത്. ‘പൂച്ചയ്ക്ക് പൊന്നുരുക്കുന്നിടത്ത് എന്ത് കാര്യം’ എന്ന് ചോദിക്കുന്നു ചിലർ. ഒരോ എംഎൽഎയ്ക്കും എത്ര ആളുകളെ സംഘടിപ്പിക്കണമെന്നായിരുന്നു ടാർജെറ്റ് എന്ന് ചോദിച്ച വിരുതൻമാരും ഉണ്ട്.
ഭരണത്തിലുള്ള സംസ്ഥാനത്തുപോലും സമ്മേളനത്തിന് ആളെ സംഘടിപ്പിക്കാൻ കഴിയാത്ത പാർട്ടി കേന്ദ്രസർക്കാറിനെതിരെ എങ്ങിനെ പ്രക്ഷോഭം നടത്തുമെന്ന് സംശയം പ്രകടിപ്പിക്കുന്ന കോൺഗ്രസ് അനുഭാവികളും കമന്റുകളിടുന്നുണ്ട്.
കോൺഗ്രസിന്റെ അഖിലേന്ത്യാ ഭാരവാഹിത്വം ഇല്ലാത്ത നേതാക്കൾ പോലും കേരളത്തിൽ നിന്നും ജയ്പൂരിലേയ്ക്ക് സമ്മേളനത്തിൽ പങ്കെടുക്കാനായി പോയിരുന്നു.എംഎൽഎമാരായ ടി സിദ്ധീഖ്, അൻവർ സാദത്ത്, റോജി എം ജോൺ, എപി അനിൽകുമാർ തുടങ്ങിയവർ സമ്മേളനത്തിൽ പങ്കെടുത്തതിന്റെ ഫോട്ടോ പങ്ക് വെച്ചിട്ടുണ്ട്. കോൺഗ്രസ് നേതാക്കളായ രാഹുൽ ഗാന്ധിയും പ്രിയങ്ക ഗാന്ധിയും റാലിയിൽ പങ്കെടുത്തു
