തിരുവനന്തപുരം: ലോകായുക്ത നിയമഭേദഗതിക്ക് നിര്‍ദ്ദേശം നല്‍കുന്ന ഓര്‍ഡിനന്‍സ് ഗവര്‍ണര്‍ ആരിഫ് മുഹമ്മദ് ഖാന്റെ പരിഗണനയിലിരിക്കെ, ലക്ഷദ്വീപ് സന്ദര്‍ശനം കഴിഞ്ഞ് അദ്ദേഹം ഇന്ന് വൈകിട്ട് ആറിന് തിരുവനന്തപുരത്ത് എത്തിച്ചേരും. ലോകായുക്തയുടെ അധികാരം കവരുന്ന വ്യവസ്ഥകളടങ്ങിയ ഓര്‍ഡിനന്‍സ് അംഗീകരിക്കരുതെന്ന് ആവശ്യപ്പെട്ട് പ്രതിപക്ഷ നേതാവ് വിഡി സതീശന്‍ ഗവര്‍ണര്‍ക്ക് കത്ത് നല്‍കിയിരുന്നു.
ഇതിനുള്ള മറുപടി ഗവര്‍ണര്‍ സര്‍ക്കാരിനോട് തേടുകയും സര്‍ക്കാര്‍ ഇന്ന് രാജ്ഭവന് മറുപടി നല്‍കുകയും ചെയ്യും. തുടര്‍ന്നാണ് ഇതുസംബന്ധിച്ച് തീരുമാനം കൈക്കൊള്ളുക. എന്നാല്‍ ലോകായുക്ത നിയമഭേദഗതിയുമായി ബന്ധപ്പെട്ട് സര്‍ക്കാരുമായി ഗവര്‍ണര്‍ ഏറ്റുമുട്ടാനിടയില്ല.
ഗവര്‍ണര്‍ അനുമതി നല്‍കിയില്ലെങ്കില്‍ നിയമസഭയില്‍ ബില്ല് അവതരിപ്പിച്ച് പാസാക്കാന്‍ സാധ്യതനിലനില്‍ക്കുന്ന സാഹചര്യത്തില്‍ ഓര്‍ഡിനന്‍സിന് ഗവര്‍ണ്‍ അംഗീകാരം നല്‍കാനാണ് സാധ്യത. അതെ സമയം ലോകായുക്ത നിയമഭേദഗതിയുമായി മുന്നോട്ടുപോയാല്‍ നിയമനടപടിയിലേക്ക് കടക്കാനാണ് പ്രതിപക്ഷ തീരുമാനം.
