ആലപ്പുഴ: ആലപ്പുഴയിൽ വൻ മയക്കുമരുന്ന് ശേഖരവുമായി യുവാവ് പിടിയിൽ. എറണാകുളം തമ്മനം മുല്ലേത്ത് ലിജു(44) ആണ് പിടിയിലായത്. 138 ഗ്രാം എം.ഡി.എം.എ ആണ് ഇയാളിൽ നിന്ന് പിടിച്ചെടുത്തത്. ഇതിന് ലക്ഷങ്ങൾ വില വരുമെന്നാണ് വിവരം. തൈക്കാട്ടുശേരിയിലെ ബസ് സ്റ്റോപ്പിന് സമീപത്ത് നിന്നാണ് മയക്കുമരുന്ന് കണ്ടെത്തിയത്. ഇയാൾ യാത്ര ചെയ്ത സ്വകാര്യബസ് പരിശോധിക്കവെയാണ് മയക്കുമരുന്നുമായി പിടിയിലാകുന്നത്.
ജില്ലയിൽ ഇത്ര വലിയ അളവിൽ മയക്കുമരുന്ന് പിടികൂടുന്നത് ഇതാദ്യമായിട്ടാണെന്ന് പോലീസ് പറഞ്ഞു. കഴിഞ്ഞ രണ്ടാഴ്ചക്കിടെ ജില്ലയിൽ നടത്തിയ പരിശോധനയിൽ നാല് ഗ്രാം എംഡിഎംഎയുമായി മൂന്ന് പേർ പിടിയിലായിരുന്നു. ഈ കേസിൽ പിടിയിലായവരിൽ നിന്നും ലഭിച്ച വിവരങ്ങളുടെ അടിസ്ഥാനത്തിൽ നടത്തിയ പരിശോധനയിലാണ് വൻ മയക്കുമരുന്ന് ശേഖരം പിടികൂടുന്നത്.
പ്രതിയെ ഇന്ന് കോടതിയിൽ ഹാജരാക്കും. മയക്കുമരുന്ന് എവിടെ നിന്നാണ് എത്തിച്ചത് എന്നറിയാൻ വിശദമായ അന്വേഷണം നടത്തുമെന്നും പോലീസ് വ്യക്തമാക്കിയിട്ടുണ്ട്.
