വ്ളാഡിമിർ പുടിന്റെ ‘ഓണററി പ്രസിഡന്റ്’ പദവി സസ്‌പെൻഡ് ചെയ്ത് അന്താരാഷ്‌ട്ര ജൂഡോ ഫെഡറേഷൻ; നടപടി യുക്രെയ്നുമായുളള യുദ്ധത്തിന്റെപശ്ചാതലത്തിൽ

മോസ്‌കോ: യുക്രെയ്നുമായുളള യുദ്ധത്തിന്റെ പശ്ചാത്തലത്തിൽ റഷ്യൻ പ്രസിഡന്റ് വ്ളാഡിമിർ പുടിന്റെ ‘ഓണററി പ്രസിഡന്റ്, അംബാസഡർ’ പദവികൾ അന്താരാഷ്‌ട്ര ജൂഡോ ഫെഡറേഷൻ (ഐജെഎഫ്) സസ്‌പെൻഡ് ചെയ്തു. യുക്രെയ്നിലെ സംഘർഷാവസ്ഥ കണക്കിലെടുത്താണ് തീരുമാനമെന്ന് ഫെഡറേഷൻ ഔദ്യോഗിക പ്രസ്താവനയിൽ പറഞ്ഞു. ആയോധന കലയായ ജൂഡോയിൽ പ്രാഗൽഭ്യം തെളിയിച്ച ആളാണ് പുടിൻ. ബ്ലാക്ക് ബെൽറ്റ് പദവിയും സ്വന്തമാക്കിയിട്ടുണ്ട്. അന്താരാഷ്‌ട്ര ജൂഡോ ഫെഡറേഷൻ 2008ലാണ് റഷ്യൻ പ്രസിഡന്റിന് ഓണററി പദവി നൽകി ആദരിച്ചത്.

‘യുക്രെയ്‌നിലെ യുദ്ധത്തിന്റെ പശ്ചാത്തലത്തിൽ, ഇന്റർനാഷണൽ ജൂഡോ ഫെഡറേഷന്റെ ഓണററി പ്രസിഡന്റും അംബാസഡറുമായ മിസ്റ്റർ വ്ളാഡിമിർ പുടിന്റെ പദവി താൽക്കാലികമായി നിർത്തിവച്ചതായി ഇന്റർനാഷണൽ ജൂഡോ ഫെഡറേഷൻ പ്രഖ്യാപിച്ചു. കരയിലൂടെയും വായുവിലൂടെയും കടലിലൂടെയും ആക്രമണം നടത്തി യുക്രെയ്നിലെ സൈനിക നടപടി റഷ്യ പ്രഖ്യാപിച്ചതിന് ദിവസങ്ങൾക്ക് ശേഷമാണ് തീരുമാനം.

റഷ്യൻ സൈന്യം വ്യാഴാഴ്ചയാണ് യുക്രെയ്ൻ ആക്രമിച്ചത്. അതിനുശേഷം രാജ്യത്തെ പ്രധാന നഗരങ്ങളിലുടനീളം നൂറുകണക്കിന് സൈനിക സ്ഥാപനങ്ങൾ ലക്ഷ്യമാക്കി. റിപ്പോർട്ടുകൾ പ്രകാരം സംഘർഷത്തിൽ ഇതുവരെ 600 ലധികം സാധാരണക്കാർ കൊല്ലപ്പെട്ടു. ആയിരക്കണക്കിന് ആളുകൾക്ക് പരിക്കേറ്റു. യുക്രേനിയൻ പ്രസിഡന്റ് വോളോഡിമർ സെലെൻസ്‌കി സൈനികനിയമം ഏർപ്പെടുത്തുകയും അധിനിവേശ സൈന്യത്തിനെതിരെ ആയുധമെടുക്കാൻ ജനങ്ങളെ പ്രേരിപ്പിക്കുകയും ചെയ്തു.