കൊച്ചി ; സിപിഎം 23-ാം പാർട്ടി കോൺഗ്രസിൽ പങ്കെടുത്താൽ ശശി തരൂർ എംപിക്കെതിരെ നടപടിയെന്ന് കെപിസിസി അദ്ധ്യക്ഷൻ കെ സുധാകരൻ. പാർട്ടി കോൺഗ്രസ് സെമിനാറിൽ പങ്കെടുക്കാൻ ശശി തരൂരിന് വിലക്കുണ്ട്. സിപിഎമ്മിന്റെ പരിപാടികളിൽ പങ്കെടുത്താൽ തരൂരിനെതിരെ നടപടിയുണ്ടാകുമെന്നും സുധാകരൻ മുന്നറിയിപ്പ് നൽകി.
സോണിയ ഗാന്ധിയുടെ അനുമതി കിട്ടിയാൽ തരൂരിന് പാർട്ടി കോൺഗ്രസിൽ പങ്കെടുക്കാം. വിലക്ക് ലംഘിച്ച് പങ്കെടുക്കുന്നവർക്കെതിരെ നടപടി ഉണ്ടാകുമെന്നും മുന്നറിയിപ്പ് നൽകിയിട്ടുണ്ട്. ബംഗാളിലെ സിപിഎമ്മിന്റെ ഗതികേട് കോൺഗ്രസിന് വരില്ലെന്നും സുധാകരൻ പറഞ്ഞു.
അതേസമയം തരൂരിനെ പാർട്ടി കോൺഗ്രസിലേക്ക് സ്വാഗതം ചെയ്തുകൊണ്ട് കോടിയേരി ബാലകൃഷ്ണൻ എത്തി. പങ്കെടുക്കാൻ തയ്യാറായാൽ സ്വാഗതം എന്ന് കോടിയേരി പറഞ്ഞു. ഇല്ലങ്കിൽ അവരുടെ രാഷ്ട്രീയ പാപ്പരത്തം. ആർഎസ്എസിന്റെ സഹായം ലഭിക്കാനാണ് കോൺഗ്രസ് ഇപ്പോൾ നേതാക്കൾക്ക് വിലക്ക് ഏർപ്പെടുത്തിയിരിക്കുന്നത് എന്നും കോടിയേരി ആരോപിച്ചു.
ദേശീയ പ്രാധാന്യമുള്ളതാണ് പാർട്ടി കോൺഗ്രസ് സെമിനാറിലെ വിഷയമെന്നും ഇതിൽ പങ്കെടുക്കേണ്ടത് അനിവാര്യമാണെന്നുമാണ് കോൺഗ്രസ് നേതാവ് കെവി തോമസ് പറഞ്ഞത്. ഇതിനായി സോണിയാ ഗാന്ധിയെയും താരീഖ് അൻവറിനെയും വിഷയം അറിയിച്ചിട്ടുണ്ട്.
സിപിഎം പാർട്ടി കോൺഗ്രസിൽ പങ്കെടുക്കുന്നതിൽ നിന്നും തന്നെ ആരും വിലക്കിയിട്ടില്ല എന്ന് ശശി തരൂർ കഴിഞ്ഞ ദിവസം പറഞ്ഞിരുന്നു. അങ്ങനെ ആരെങ്കിലും വിലക്കുകയാണെങ്കിൽ കോൺഗ്രസ് അദ്ധ്യക്ഷ സോണിയാ ഗാന്ധിയുമായി ആലോചിച്ച് തീരുമാനമെടുക്കുമെന്നും ശശി തരൂർ പറഞ്ഞു.
