കൊച്ചി: കോണ്ഗ്രസിനെതിരെ രൂക്ഷ വിമര്ശനം ഉന്നയിച്ചു കൊണ്ടാണ് സിപിഎം പാര്ട്ടി കോണ്ഗ്രസ് സെമിനാറില് പങ്കെടുക്കുമെന്ന് മുതിര്ന്ന കോണ്ഗ്രസ് നേതാവ് കെ.വി.തോമസ് വ്യക്തമാക്കിയത്. എന്നാല് അതിന്റെ പേരില് തനിക്കെതിരെ നടപടിയെടുക്കാന് എ.ഐ.സി.സിക്ക് മാത്രമേ കഴിയൂ എന്നും കെ.വി.തോമസ് വിമര്ശിച്ചു. പാര്ട്ടിയില് നിന്ന് പുറത്താക്കുമെന്ന് ഭീഷണിയുടെ സ്വരത്തിലാണ് പറഞ്ഞത്. താന് ഇപ്പോഴും അകത്താണ്. എ.ഐ.സി.സി അംഗമായ തന്നെ കെ.പി.സി.സിക്ക് പുറത്താക്കാനാകില്ല. 2018 ഡിസംബറിന് ശേഷം രാഹുല് ഗാന്ധിയെ കാണാന് കഴിഞ്ഞിട്ടില്ല. താന് പാര്ട്ടിയെ വെച്ച് പണം ഉണ്ടാക്കിയിട്ടില്ല. തന്റെ മക്കള് ആരും പാര്ട്ടിയിലില്ലെന്നും കെ.വി.തോമസ് പറഞ്ഞു.
പാര്ട്ടി പദവിയില് മാനദണ്ഡം പ്രായമാണെങ്കില് എല്ലാവര്ക്കും ബാധകമാക്കണം. തന്നെക്കാള് പ്രായമായവരും ഇപ്പോഴും പദവിയിലുണ്ടല്ലോ. 2019ല് തനിക്ക് സീറ്റ് നിഷേധിച്ചു. അന്ന് തിരഞ്ഞെടുപ്പ് കമ്മിറ്റി കൂടുന്നതിന് ഒരു മണിക്കൂര് മുമ്പാണ് സീറ്റില്ലെന്ന് അറിയിച്ചത്. ഒന്നര വര്ഷം പിന്നിട് കാത്തിരുന്നു. പാര്ലമെന്റില് പോകാനല്ല, പാര്ട്ടിയില് അര്ഹമായ പരിഗണന കിട്ടുമെന്ന് കരുതി. അതുണ്ടായില്ല. ഏഴു വട്ടം ജയിച്ചത് എന്റെ തെറ്റല്ല. വര്ക്കിംഗ് പ്രസിഡന്റാക്കിയ ശേഷം നാല് മാസം കൊണ്ട് മാറ്റി. തന്നെ പരമാവധി അപമാനിക്കുകയാണ്.
എന്നും കോണ്ഗ്രസുകാരനായിരിക്കും. പക്ഷേ സെമിനാറില് പോയി സംസാരിക്കും. ദേശീയ പ്രാധാന്യമുള്ള സെമിനാര് ആയതിനാലാണ് പങ്കെടുക്കാന് താല്പര്യമറിയച്ചത്. താന് പാര്ട്ടി കോണ്ഗ്രസിനല്ല, സെമിനാറിനാണ് പോകുന്നത്. താന് പാര്ട്ടിയില് പൊട്ടി മുളച്ചതല്ല. താന് ജന്മം കൊണ്ട് കോണ്ഗ്രസുകാരനാണ്. സോണിയ ഗാന്ധിയെ ഇന്നത്തെ രാഷ്ട്രീയ സാഹചര്യം ബോധിപ്പിച്ചിട്ടുണ്ടെന്നും കെ.വി.തോമസ് പറഞ്ഞു.
Comments