കൊച്ചി: പാര്ട്ടി വിലക്ക് ലംഘിച്ച് സിപിഎം പാര്ട്ടി കോണ്ഗ്രസില് പങ്കെടുക്കാനൊരുങ്ങുന്ന കെ.വി.തോമസിനെതിരെ രൂക്ഷ വിമര്ശനവുമായി ചെറിയാന് ഫിലിപ്പ്. കെ.വി.തോമസിന്റേത് ആത്മഹത്യാപരമായ നടപടിയാണെന്നാണ് ചെറിയാന് ഫിലിപ്പിന്റെ വിമര്ശനം. അന്ത്യവിശ്രമത്തിന് തെമ്മാടിക്കുഴിയില് പോലും സ്ഥാനം ലഭിക്കില്ലെന്നും ചെറിയാന് ഫിലിപ്പ് ഫെയ്സ്ബുക്ക് പോസ്റ്റില് കുറിച്ചു. സിപിഎം പാര്ട്ടി കോണ്ഗ്രസിലേക്ക് ക്ഷണം ലഭിച്ചപ്പോള് തന്നെ കെ.വി.തോമസിന് ചെറിയാന് ഫിലിപ്പ് മുന്നറിയിപ്പ് നല്കിയിരുന്നു.
സിപിഎമ്മിന്റെ പ്രണയത്തട്ടിപ്പില് കുടുങ്ങരുതെന്നായിരുന്നു നേരത്തെ കെ.വി.തോമസിനോട് ചെറിയാന് ഫിലിപ്പ് അഭ്യര്ത്ഥിച്ചത്. ‘ പ്രണയം അഭിനയിച്ച് അടുത്തു കൂടി രക്തം ഊറ്റിക്കുടിച്ച ശേഷം വലിച്ചെറിയുന്ന രക്തരക്ഷസാണ് സി പി എം. യൗവ്വനം മുതല് ഇഎംഎസ് ഉള്പ്പെടെയുള്ളവര് തന്നെ സി പി എം വേദികളിലേക്ക് ആനയിച്ചിരുന്നു. അന്നത്തെ സ്റ്റേഹം വ്യാജമാണെന്ന് സഹയാത്രികനായ ശേഷമാണ് ബോദ്ധ്യപ്പെട്ടത്. ആ മരണക്കെണിയില് ഇരുപതു വര്ഷത്തെ രാഷ്ട്രീയ ജീവിതം ഹോമിക്കേണ്ടി വന്നു. അറവുശാലയിലേക്ക് കൊണ്ടുപോകുന്ന ആടുമാടുകളെ ഉടമസ്ഥര് ഒരിക്കലും പട്ടിണിക്കിടാറില്ല. കോണ്ഗ്രസിന്റെ ജനാധിപത്യ സംസ്ക്കാരത്തില് ജനിച്ചു വളര്ന്ന കെ.വി തോമസിന് സി പി എം ന്റെ വിധ്വംസക രാഷ്ട്രീയവുമായി ഒരിക്കലും പൊരുത്തപ്പെടാനാവില്ല’ എന്നായിരുന്നു മുന്നറിയിപ്പ്.
കോണ്ഗ്രസിനെതിരെ രൂക്ഷ വിമര്ശനം ഉയര്ത്തിക്കൊണ്ടാണ് സിപിഎം പാര്ട്ടി കോണ്ഗ്രസ് സെമിനാറില് പങ്കെടുക്കുമെന്ന് കെ.വി.തോമസ് പ്രഖ്യാപിച്ചത്. ദേശീയ പ്രാധാന്യമുള്ള സെമിനാര് ആയതിനാലാണ് പങ്കെടുക്കാന് തീരുമാനിച്ചതെന്നും അദ്ദേഹം അറിയിച്ചു.എന്നാല് അതിന്റെ പേരില് തനിക്കെതിരെ നടപടിയെടുക്കാന് എ.ഐ.സി.സിക്ക് മാത്രമേ കഴിയൂ. പാര്ട്ടിയില് നിന്ന് പുറത്താക്കുമെന്ന് ഭീഷണിയുടെ സ്വരത്തിലാണ് പറഞ്ഞത്. താന് ഇപ്പോഴും അകത്താണ്. എ.ഐ.സി.സി അംഗമായ തന്നെ കെ.പി.സി.സിക്ക് പുറത്താക്കാനാകില്ല. തന്നെ പരമാവധി അപമാനിക്കുകയാണെന്നും കെ.വി.തോമസ് വിമര്ശിച്ചിരുന്നു.
Comments