മലപ്പുറം: സന്തോഷ് ട്രോഫി ഫുട്ബോൾ ചാമ്പ്യൻഷിപ്പിന്റെ രണ്ടാം സെമിയിൽ മണിപ്പൂരിനെ പരാജയപ്പെടുത്തി പശ്ചിമ ബംഗാൾ ഫൈനലിൽ. എതിരില്ലാത്ത മൂന്ന് ഗോളിനായിരുന്നു ബംഗാളിന്റെ ജയം. ഇതോടെ കേരളവും ബംഗാളുമായുളള ക്ലാസിക്ക് ഫൈനലിനാണ് വേദി ഒരുങ്ങുന്നത്.
മണിപ്പൂരിനെതിരെ രണ്ടാം മിനിറ്റിൽ തന്നെ ബംഗാൾ ലീഡ് നേടി. ബോക്സിന് പുറത്തുളള സുജിത് സിങ്ങിന്റെ അടി മണിപ്പൂർ ഗോൾകീപ്പറുടെ കൈയ്യിൽ തട്ടി വലയിലെത്തി. ഏഴാം മിനിറ്റിലും മണിപ്പൂരിനെ രണ്ടാം ഗോളിലൂടെ ബംഗാൾ ഞെട്ടിച്ചു. ഫർദിൻ അലി മൊല്ലയാണ് ഈ ഗോൾ നേടിയത്. 74 ാം മിനിറ്റിലായിരുന്നു ബംഗാളിന്റെ മൂന്നാം ഗോൾ.
46 ാം തവണയാണ് ബംഗാൾ സന്തോഷ് ട്രോഫി ഫൈനലിൽ എത്തുന്നത്. അതിൽ 32 തവണ ബംഗാൾ ചാമ്പ്യൻമാരായി. സന്തോഷ് ട്രോഫി ചാമ്പ്യൻഷിപ്പിൽ കേരളവും ബംഗാളും നേർക്കുനേർ വരുന്നത് ഇത് നാലാം തവണയാണ്. 1989,1994 വർഷങ്ങളിലെ ഫൈനലിൽ ബംഗാളിനായിരുന്നു വിജയം.
അവസാനമായി കേരളവും ബംഗാളും തമ്മിൽ ഏറ്റുമുട്ടിയപ്പോൾ കേരളത്തിന് ആയിരുന്നു വിജയം. 2018 ലെ സന്തോഷ് ട്രോഫി ഫൈനലിൽ സ്വന്തം മൈതാനത്ത് വെച്ച് പെനാൽറ്റി ഷൂട്ടൗട്ടിൽ പരാജയപ്പെടുത്തിയാണ് കേരളം കിരീടം ചൂടിയത്.
