യുക്രെയ്‌നിലെ ഇന്ത്യൻ എംബസി വീണ്ടും കീവിലേക്ക്; പ്രഖ്യാപനവുമായി വിദേശകാര്യ മന്ത്രാലയം

കീവ്: യുക്രെയ്‌നിലെ ഇന്ത്യൻ എംബസി വീണ്ടും കീവിൽ പ്രവർത്തനം തുടങ്ങുമെന്ന് പ്രഖ്യാപിച്ച് കേന്ദ്ര വിദേശകാര്യ മന്ത്രാലയം. മെയ് 17 മുതലാണ് എംബസിയുടെ പ്രവർത്തനം കീവിൽ ആരംഭിക്കുക. താൽകാലികമായി പോളണ്ടിലെ വാഴ്സോയിൽ ഇന്ത്യൻ എംബസിയുടെ പ്രവർത്തനം പുരോഗമിക്കുകയാണ് .

യുക്രെയ്‌നിലെ റഷ്യൻ അധിനിവേശത്തെ തുടർന്നുണ്ടായ യുദ്ധത്തിന്റെ പശ്ചാത്തലത്തിൽ മാർച്ച് 13 മുതലായിരുന്നു ഇന്ത്യൻ എംബസിയുടെ പ്രവർത്തനം കീവിൽ നിന്നും വാഴ്സോയിലേക്ക് മാറ്റിയത്. യുദ്ധം രൂക്ഷമായതിന് പിന്നാലെ 20,000ത്തിലധികം വരുന്ന ഇന്ത്യക്കാരെ തിരികെ നാട്ടിലേക്ക് മടങ്ങിക്കൊണ്ടുവന്നിരുന്നു. ഓപ്പറേഷൻ ഗംഗ എന്നായിരുന്നു രക്ഷാദൗത്യത്തിന്റെ പേര്.

ഫെബ്രുവരി 24നാണ് യുക്രെയ്‌നിൽ റഷ്യ യുദ്ധം പ്രഖ്യാപിച്ചത്. ഏകദേശം 6.03 ദശലക്ഷമാളുകളാണ് യുദ്ധത്തെ തുടർന്ന് യുക്രെയ്‌നിൽ നിന്നും പലായനം ചെയ്യപ്പെട്ടത്. ഇരുരാജ്യങ്ങളുടെയും നിരവധി പട്ടാളക്കാർ കൊല്ലപ്പെടുകയും ചെയ്തു. ആയിരക്കണക്കിന് സാധാരണക്കാരും യുദ്ധത്തിൽ കൊല്ലപ്പെട്ടിട്ടുണ്ട്.