ന്യൂഡൽഹി: എയർ ഇന്ത്യ വിമാനത്തിന്റെ എഞ്ചിൻ തകരാറിലായതിനെ തുടർന്ന് അടിയന്തിരമായി തിരിച്ചിറക്കി. മുംബൈ വിമാനത്താവളത്തിൽ നിന്ന് പറന്നുയർന്ന എ320 നിയോ വിമാനമാണ് എഞ്ചിൻ പ്രശ്നത്തെ തുടർന്ന് തിരിച്ചിറക്കിയത്. ബെംഗളൂരുവിലേക്ക് പോകാനിരുന്ന വിമാനമാണിത്.
മുംബൈയിൽ നിന്ന് പുറപ്പെട്ടതിന് പിന്നാലെ 27 മിനിറ്റുകൾ പിന്നിട്ടപ്പോഴായിരുന്നു സംഭവം. സാങ്കേതിക പ്രശ്നങ്ങളെ തുടർന്ന് എഞ്ചിൻ നിലക്കുകയായിരുന്നു. ഛത്രപതി ശിവാജി അന്താരാഷ്ട്ര വിമാനത്താവളത്തിൽ നിന്നും വെള്ളിയാഴ്ച രാവിലെ 9.43-നായിരുന്നു വിമാനം പറന്നുയർന്നത്. തുടർന്ന് എഞ്ചിൻ നിലക്കാൻ പോകുകയാണെന്ന് പൈലറ്റിന് മുന്നറിയിപ്പ് ലഭിച്ചു. ഇതോടെ മുംബൈ എയർപോർട്ടിൽ രാവിലെ 10.10ന് വിമാനം തിരിച്ചിറക്കി. വിമാനത്തിനുള്ളിലെ യാത്രക്കാർ എല്ലാവരും സുരക്ഷിതരാണ്.
തുടർന്ന് വിമാനത്തിലുണ്ടായിരുന്ന യാത്രക്കാരെ മറ്റൊരു വിമാനത്തിൽ ബെംഗളൂരുവിലെത്തിക്കുകയായിരുന്നു. സംഭവത്തിൽ ഡിജിസിഐ അന്വേഷണത്തിന് ഉത്തരവിട്ടിട്ടുണ്ട്.
