ന്യൂഡൽഹി: രാജ്യം ഓരോ വർഷവും മുന്നേറ്റത്തിലാണെന്ന് തെളിയിക്കുന്ന കണക്കുകളുമായി തൊഴിൽ-ധനകാര്യവകുപ്പുകൾ. തൊഴിൽ ലഭ്യത വർദ്ധിച്ചതിന്റെ തെളിവുകളാണ് പുറത്ത് വന്നിരിക്കുന്നത്. ദേശീയ പെൻഷൻ പദ്ധതിയും ദേശീയ പ്രൊഫിഡന്റ് ഫണ്ട് കണക്കുകളുമാണ് കേന്ദ്രസർക്കാറിന്റെ പരിശ്രമങ്ങൾക്ക് പിൻബലമേകുന്നത്.
തൊഴിലവസരങ്ങളുടെ എണ്ണത്തിൽ വൻ വർദ്ധനയാണ് ഉണ്ടായിരിക്കുന്നത്.കൊറോണ കാലത്തിന് ശേഷം ആഗോളതലത്തിൽ സാമ്പത്തിക സ്ഥിരത കൈവരിച്ച ഏക രാജ്യം തദ്ദേശീയ തൊഴിൽ മേഖലയിലും ലക്ഷക്കണക്കിന് പേർക്ക് തൊഴിൽ നൽകുന്നതിലും വിജയിച്ചിരിക്കുന്നു. 2022 ഏപ്രിൽ മാസത്തിൽ ദേശീയ പെൻഷൻ പദ്ധതിയിൽ വലിയ കുതിപ്പാണുണ്ടായിരിക്കുന്നത്. പുതുതായി ഈ വർഷം 64,569 പുതിയ അംഗങ്ങൾ ചേർന്നതായാണ് കണക്ക്.
തൊഴിലാളികളുടെ പ്രൊവിഡന്റ് ഫണ്ടിന്റെ കാര്യത്തിലും വൻകുതിപ്പാണ് രേഖപ്പെടുത്തിയിട്ടുള്ളത്. ഈ വർഷം 9,22,752 പുതിയ അംഗങ്ങൾ പ്രൊഫിഡന്റ് ഫണ്ട് പോലുള്ള തൊഴിൽ സാമ്പത്തിക ഭദ്രതയുടെ ഭാഗമായെന്നാണ് സാമ്പത്തിക വർഷത്തെ പുതിയ കണക്ക് തെളിയിക്കുന്നത്.
