ലണ്ടൻ: വിംബിൾഡണിൽ ആദ്യ റൗണ്ട് കടന്ന ജോക്കോവിച്ച് ചരിത്രനേട്ടവും സ്വന്തമാക്കി. ഈ സീസണിലെ പോരാട്ടത്തിൽ ദക്ഷിണ കൊറിയൻ താരം വോൺ സൂൺ വൂവിനെ 6-3, 3-6, 6-3,6-4നാണ് ജോക്കോവിച്ച് തോൽപ്പിച്ചത്. ജയത്തോടെ പുരുഷ-വനിതാ താരങ്ങളിൽ നാല് ഗ്രാൻസ്ലാമും സിംഗിൾസിൽ 80 ജയങ്ങളും സ്വന്തമാക്കുന്ന ആദ്യ ടെന്നീസ് താരമെന്ന നേട്ടവും സെർബിയൻ താരത്തിന്റെ പേരിലായി.
വിംബിൾഡണിൽ ജോക്കോവിച്ച് 22-ാം ജയമാണ് സ്വന്തമാക്കിയത്. തുടർച്ചയായ നാലാം കിരീടം സ്വന്തമാക്കാനാണ് ജോക്കോവിച്ച് ഇറങ്ങുന്നത്. ഗ്രാസ് കോർട്ടിൽ നിന്ന് മാസങ്ങളോളം വിട്ടു നിന്ന ശേഷമുള്ള വരവിൽ ശക്തമായ ഏറ്റുമുട്ടലുകൾ നടത്താതെയാണ് ജോക്കോവിച്ച് ആദ്യ റൗണ്ട് മറികടന്നത്.
വിബിംൾഡണിലെ മറ്റ് മത്സരങ്ങളിൽ ഏഴാം സീഡ് പോളണ്ടിന്റെ ഹ്യൂബർട്ട് ഹർക്കാസിന് അടിതെറ്റി. 37-ാം റാങ്കിലുള്ള ഡിവിഡോവിച്ച് ഫോകിന, ഹർക്കാസിനെ രണ്ടിനെതിരെ മൂന്ന് സെറ്റുകൾക്ക് അട്ടിമറിച്ചു. മറ്റൊരു മത്സരത്തിൽ ബ്രിട്ടന്റെ സ്വന്തം താരം ആൻഡി മുറെ ഓസ്ട്രേലിയയുടെ ഡക്വർത്തിനെ ഒന്നിനെതിരെ മൂന്ന് സെറ്റുകൾക്ക് തകർത്ത് രണ്ടാം റൗണ്ടിലെത്തി.
