തിരുവനന്തപുരം: ദേശീയ ചിഹ്നമായ അശോകസ്തംഭത്തിലുള്ളത് മൂന്ന് സിംഹങ്ങളാണെന്ന് തെറ്റിപ്പറഞ്ഞ് സിപിഎം പോളിറ്റ് ബ്യൂറോ അംഗം എം.എ ബേബി. കേന്ദ്രസർക്കാരിനെതിരെ ഫേസ്ബുക്കിലിട്ട വിമർശനക്കുറിപ്പിലാണ് മുൻ വിദ്യാഭ്യാസ മന്ത്രി കൂടിയായ എംഎ.ബേബി അശോകസ്തംഭത്തിലെ സിംഹങ്ങളുടെ എണ്ണം തെറ്റായി എഴുതിയത്. അശോകസ്തംഭത്തിൽ നാല് സിംഹങ്ങളുണ്ടെന്ന സാമാന്യ വിവരമെങ്കിലും എംഎ ബേബിയ്ക്ക് വേണമെന്നാണ് സോഷ്യൽ മീഡിയയിൽ ഉയരുന്ന പരിഹാസം.
പുതിയ പാർലമെന്റ് മന്ദിരത്തിന് മുകളിലെ അശോകസ്തംഭം പ്രധാനമന്ത്രി അനാച്ഛാദനം ചെയ്തതിന് പിന്നാലെയായിരുന്നു എംഎ ബേബിയുടെ വിമർശക്കുറിപ്പ്. പുതിയ പാർലമെന്റ് മന്ദിരത്തിന് മുകളിൽ ഇന്നലെ പ്രധാനമന്ത്രി നരേന്ദ്ര മോദി അനാച്ഛാദനം ചെയ്തത് അശോകസ്തംഭത്തിന്റെ വികലമായ പകർപ്പാണെന്ന് എംഎ ബേബി ആരോപിച്ചു. പുതിയ അശോകസ്തംഭം പ്രതിനിധീകരിക്കുന്നത് മോദിയുടെ ഇന്ത്യയെയാണ്. ജനാധിപത്യവാദികളും പ്രതിഭാധനരുമായ ഇന്ത്യൻ സ്വാതന്ത്ര്യസമരനായകർ നിശ്ചയിച്ച ഇന്ത്യയുടെ ചിഹ്നം അല്ലിത്. കലാചാതുരിയില്ലാത്ത ഈ വികലശില്പം, അതിശക്തരായിരിക്കെതന്നെ ശാന്തരായി ഇരിക്കുന്ന മൂന്നു സിംഹങ്ങളുടെ സ്ഥാനത്ത് ദുഷ്ടതയും ക്രൗര്യവും വെളിപ്പെടുത്തുന്ന തുറിച്ച പല്ലുകളുമായി നില്ക്കുന്ന ദുഷ്ടമൃഗങ്ങളെ പ്രതിഷ്ഠിച്ചിരിക്കുന്നു. അർത്ഥവത്തായ അശോകസ്തംഭത്തെയും ഇന്ത്യയുടെ അടയാളത്തെയും മോദി അപമാനിക്കുകയാണെന്നും സിപിഎം നേതാവ് ആരോപിക്കുന്നുണ്ട്.
സ്വേച്ഛാധിപത്യവും ഹിംസയും കലയെ ഉല്പാദിപ്പിക്കില്ല. മനുഷ്യപ്രതിഭയുടെ സ്വച്ഛസ്വാതന്ത്ര്യമേ കലയുടെ പ്രസൂതികളാവൂ എന്നത് ആർഎസ്എസുകാർക്ക് മനസ്സിലാവുന്ന കാര്യമല്ല. ഇന്ത്യൻ പാർലമെന്റിനുമുകളിൽ പ്രതിഷ്ഠിച്ച ഈ വികലസൃഷ്ടി മോദിയുടെ ഭരണത്തെ പ്രതിനിധീകരിക്കും, ഇന്ത്യയുടെ ജനാഭിപ്രായത്തെ വെല്ലുവിളിക്കും. അതിനാൽ കഴിയും വേഗം ഈ വൈകൃതം നമ്മുടെ പാർലമെന്റിന് മുകളിൽ നിന്ന് എടുത്തു മാറ്റണമെന്നും എംഎ ബേബി ഫേസ്ബുക്ക് കുറിപ്പിൽ ആവശ്യപ്പെടുന്നുണ്ട്.
കുറിപ്പ് പുറത്തുവന്നതിന് പിന്നാലെയാണ് അബദ്ധം ചൂണ്ടിക്കാട്ടി സോഷ്യൽ മീഡിയ ഉപയോക്താക്കൾ രംഗത്തെത്തിയത്. സ്ക്രീൻഷോട്ടുകൾ വ്യാപകമായി പ്രചരിക്കുകയും ചെയ്തു. രാഷ്ട്രത്തോടുളള സിപിഎം നേതാക്കളുടെ കാഴ്ചപ്പാടിനും പ്രതിബദ്ധതയ്ക്കും തെളിവാണ് ഈ അജ്ഞതയെന്നും വിമർശനം ഉയർന്നു. നാല് സിംഹങ്ങളാണ് അശോകസ്തംഭത്തിലുള്ളതെന്ന കമന്റുകൾ എം.എ ബേബിയുടെ പോസ്റ്റിന് താഴെ നിറഞ്ഞു. ചിത്രത്തിൽ വരയ്ക്കുമ്പോൾ മൂന്ന് സിംഹങ്ങളേ കാണാൻ പറ്റുകയുള്ളൂവെന്നും നാലാമത്തെ എണ്ണം പിൻവശത്തുണ്ടെന്നും ചിലർ എം.എ ബേബിയെ ബോദ്ധ്യപ്പെടുത്തിട്ടുണ്ട്. എംഎ ബേബിയ്ക്കായി അശോകസ്തംഭത്തെക്കുറിച്ചുള്ള മുഴുവൻ വിവരങ്ങളും ചിലർ ഫേസ്ബുക്കിൽ കമന്റായി കുറിച്ചിട്ടുണ്ട്.
Comments