തിരുവനന്തപുരം: എംഎം മണിക്കെതിരായ അധിക്ഷേപ പരാമർശത്തിൽ ഖേദം പ്രകടിപ്പിച്ച് കെപിസിസി പ്രസിഡന്റ് കെ സുധാകരൻ. പരാമർശം വേണ്ടിയിരുന്നില്ലെന്ന് പിന്നീട് തോന്നി. പെട്ടെന്നുണ്ടായ ക്ഷോഭത്തിൽ അധികം ചിന്തിക്കാതെ പ്രതികരിച്ചതാണ്, മനസിൽ ഉദ്ദേശിച്ചതല്ല പുറത്ത് വന്നതെന്നും അദ്ദേഹം പറഞ്ഞു. തെറ്റിനെ തെറ്റായി കാണുന്നു. യാതൊരു ന്യായീകരണത്തിനും മുതിരാതെ നിർവ്യാജം ഖേദം പ്രകടിപ്പിക്കുന്നെന്നും അദ്ദേഹം കൂട്ടിച്ചേർത്തു.ഫേസ്ബുക്ക് പോസ്റ്റിലൂടെയാണ് ഖേദപ്രകടനം.
ഇന്ന് ഉച്ചയോടെയാണ് ഏറെ വിമർശനങ്ങൾക്ക് കാരണമായ വിവാദ പരാമർശം കെപിസിസി പ്രസിഡന്റ് നടത്തിയത്. മണിയുടെ മുഖവും ചിമ്പാൻസിയുടെ മുഖവും ഒന്നാണ്. അത് അങ്ങനെയായി പോയതിന് ഞങ്ങളെന്ത് പിഴച്ചു, സൃഷ്ടാവിനോടല്ലേ പോയി പറയേണ്ടതെന്നും സുധാകരൻ ചോദിച്ചിരുന്നു.
മണിയുടെ മുഖചിത്രം ചിമ്പാൻസിയുടെ ചിത്രത്തോട് ചേർത്ത് മഹിളാ കോൺഗ്രസ് പ്രവർത്തകർ നടത്തിയ നിയമസഭാ മാർച്ചിൽ പ്രതികരിക്കവെയാണ് ഈ പരാമർശം നടത്തിയത്. ഇതിന് പിന്നാലെ പ്രതിപക്ഷ നേതാവ് വിഡി സതീശൻ ഇടപെട്ടപ്പോൾ മഹിളാ കോൺഗ്രസ് ഖേദം പ്രകടിപ്പിച്ചിരുന്നെങ്കിലും സുധാകരൻ തിരുത്താൻ തയ്യാറായിരുന്നില്ല. വിവാദം കനത്തതോടെ സുധാകരൻ സ്വയം മുന്നോട്ട് വന്ന് ഖേദം പ്രകടിപ്പിക്കുകയായിരുന്നു.
Comments