കോട്ടയം: പോപ്പുലർഫ്രണ്ട് നേതാവിന്റെ ഫേസ്ബുക്ക് പോസ്റ്റ് സമൂഹമാദ്ധ്യമത്തിൽ പങ്കുവെച്ച പോലീസ് ഉദ്യോഗസ്ഥയ്‌ക്ക് സസ്‌പെൻഷൻ. കാഞ്ഞിരപ്പള്ളി പോലീസ് സ്‌റ്റേഷനിലെ എഎസ്‌ഐ റംല ഇസ്മയിലിനെയാണ് സസ്‌പെൻഡ് ചെയ്തത്. ജില്ലാ പോലീസ് മേധാവിയുടെ ശുപാർശയെ തുടർന്നാണ് നടപടി.
ഈ മാസം അഞ്ചിനായിരുന്നു പോപ്പുലർഫ്രണ്ട് നേതാവിന്റെ ഫേസ്ബുക്ക് പോസ്റ്റ് റംല സ്വന്തം അക്കൗണ്ടിൽ പങ്കുവെച്ചത്. പോപ്പുലർഫ്രണ്ട് സംസ്ഥാന സെക്രട്ടറി സി.എ റൗഫിന്റെ ഫേസ്ബുക്ക് പോസ്റ്റായിരുന്നു റംല ഷെയർ ചെയ്തത്. ആലപ്പുഴയിലെ കൊലവിളി മുദ്രാവാക്യ കേസിൽ അറസ്റ്റിലായ പ്രവർത്തകർ ജാമ്യത്തിൽ ഇറങ്ങിയതുമായി ബന്ധപ്പെട്ടായിരുന്നു പോപ്പുലർഫ്രണ്ട് സംസ്ഥാന നേതാവിന്റെ ഫേസ്ബുക്ക് പോസ്റ്റ്. ഇതിൽ പോലീസിനും കോടതിയ്‌ക്കുമെതിരെ വിമർശനവും ഉണ്ടായിരുന്നു. ഇതാണ് വനിതാ എഎസ്‌ഐ പങ്കുവെച്ചത്. സംഭവം വിവാദമായതോടെ ഇവർക്കെതിരെ അന്വേഷണം നടത്തുകയായിരുന്നു.
കാഞ്ഞിരപ്പള്ളി ഡിവൈഎസ്പിയാണ് ഇവർക്കെതിരെ അന്വേഷണം നടത്തിയത്. ഈ റിപ്പോർട്ടിന്റെ അടിസ്ഥാനത്തിൽ ജില്ലാ പോലീസ് മേധാവി നടപടിയ്‌ക്ക് ശുപാർശ ചെയ്യുകയായിരുന്നു. അതേസമയം സംഭവം മനപ്പൂർവ്വമല്ലെന്നും, അബദ്ധത്തിൽ സംഭവിച്ചതാണെന്നുമാണ് റംലയുടെ വാദം.
