കണ്ണൂർ: പിണറായി പാനുണ്ടയിൽ സിപിഎം സംഘം മർദ്ധിച്ച ആർഎസ്എസ് പ്രവർത്തകൻ കുഴഞ്ഞ് വീണ് മരിച്ച സംഭവത്തിൽ പോലീസ് സമഗ്രാന്വേഷണം നടത്തി യഥാർത്ഥ വസ്തുത പുറത്ത് കൊണ്ടു വരണണമെന്ന് ബിജെപി ജില്ലാ പ്രസിഡന്റ് എൻ. ഹരിദാസ്. തികച്ചും സമാധാനം നിലനിൽക്കുന്ന പ്രദേശത്ത് നേതൃത്വത്തിൽ ഒരു വിഭാഗത്തിന്റെ ഒത്താശയോടെയാണ് ഏകപക്ഷീയമായ അക്രമം അഴിച്ച് വിട്ടത്.
സിപിഎം സംഘത്തിന്റെ അക്രമത്തിൽ ജിംനേഷ് ഉൾപ്പടെയുള്ളവർക്ക് പരിക്കേറ്റിരുന്നു. പരിക്കേറ്റവരോടൊപ്പം ആശുപ്രതിയിലെത്തിയ ജിംനേഷ് കുഴഞ്ഞ് വീണ് മരിക്കുകയായിരുന്നു. സിപിഎം അക്രമത്തെകുറിച്ച് പ്രത്യേക സംഘം വിശദമായ അന്വേഷണം നടത്തണം. അഴിമതിയിലും വിഭാഗീയതയിലും പ്രതിക്കൂട്ടിലായ സിപിഎം നേതൃത്വം സംഘർഷം സൃഷ്ടിച്ച് അണികളുടെ ശ്രദ്ധതിരിച്ച് വിടാനും പ്രശ്നങ്ങളിൽ നിന്ന് ഒളിച്ചോടാനുമുള്ള നീക്കമാണ് നടത്തുന്നത്.
പയ്യന്നൂരിൽ ആർഎസ്എസ് ജില്ലാ കാര്യാലയത്തിന് നേരെ ബോംബെറിഞ്ഞത് ബോധപൂർവ്വം സംഘർഷം സൃഷ്ടിക്കാനായിരുന്നു. എന്നാൽ ആർഎസ്എസ്, ബിജെപി നേതൃത്വം സംയമനം പാലിക്കുകയും സംഭവത്തിൽ സിപിഎം പ്രവർത്തകർ അറസ്റ്റിലാവുകയും ചെയ്തതോടെ സിപിഎം നേതൃത്വം പൊതു സമൂഹത്തിൽ ഒറ്റപ്പെട്ടു. പാനുണ്ടയിലെ അക്രമം ബോധപൂർവ്വം കലാപം സൃഷ്ടിക്കാനുള്ള നീക്കത്തിന്റെ ഭാഗമാണെന്നും ഹരിദാസ് പറഞ്ഞു.
