സ്കൂളുകളിൽ ഉച്ചഭക്ഷണം വിതരണം ചെയ്യുന്നതിനായി കേന്ദ്ര സർക്കാർ 100 കോടി നൽകും. 2021 – 2022 വർഷത്തെ രണ്ടാമത്തെ ഗഡുവാണ് നൽകുന്നത്. ഈ തുക എത്രയും വേഗം കൈമാറാൻ കഴിയുമെന്ന് കേന്ദ്രം ഉറപ്പു നൽകിയതായി വിദ്യാഭ്യാസ മന്ത്രി വി ശിവൻകുട്ടി പറഞ്ഞു.
വിഷയത്തിൽ കേരള സർക്കാരും കേന്ദ്രവും തമ്മിൽ മുൻപേ ആശയ വിനിമയം നടത്തിയിരുന്നു. കേരളത്തിന്റെ സാമ്പത്തിക നില മോശമാണെന്നും നിലവിൽ ഈ സാഹചര്യത്തെ മറി കടക്കാനുള്ള സംവിധാനം ചെയ്യണമെന്നുമാണ് അറിയിച്ചത്. എന്നാൽ ഈ വിഷയത്തിൽ ആശങ്ക പെടേണ്ടതില്ലന്നും കേരളത്തിന് ആവശ്യമായ സഹായം ചെയ്യുമെന്നും കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ വ്യക്തമാക്കി.
സ്കൂളുകളിൽ ഗുണനിലവാരമുള്ള ഭക്ഷണം എത്തിക്കാനുള്ള നടപടികൾ സർക്കാർ ആലോചിക്കുന്നുണ്ട്. അതിനാവശ്യമായ കാര്യങ്ങൾ കേന്ദ്ര ഭക്ഷ്യ വകുപ്പ് മന്ത്രിയുമായി സംസാരിച്ചിട്ടുണ്ടെന്നും കേരളത്തിനോട് അനുഭാവപൂർണമായ സമീപനമാണ് കേന്ദ്ര സർക്കാരിന്റെ ഭാഗത്തു നിന്നും ഉണ്ടായിട്ടുള്ളതെന്നും മന്ത്രി വി ശിവൻകുട്ടി കൂട്ടിച്ചേർത്തു.
Comments