എറണാകുളം: കാലടി സംസ്കൃത സർവ്വകലാശാല പരീക്ഷയിൽ തോറ്റ എസ്എഫ്ഐ വനിതാ നേതാവിനെ ജയിപ്പിക്കാൻ വ്യാജ ഗ്രേസ് മാർക്ക്. സർവ്വകലാശാല യൂണിറ്റ് പ്രസിഡന്റ് എൽസ ജോസഫിനാണ് വ്യാജ ഗ്രേസ് മാർക്ക് നൽകി ബിരുദ പരീക്ഷയിൽ ജയിപ്പിക്കാൻ ശ്രമം നടത്തിയത്. സംഭവത്തിൽ അന്വേഷണം വേണമെന്ന് ആവശ്യപ്പെട്ട് വിദ്യാർത്ഥികൾ ഗവർണർക്ക് കത്ത് നൽകി.
യുവജനോത്സവത്തിന്റെ ഗ്രേസ് മാർക്കാണ് എൽസയ്ക്ക് സർവ്വകലാശാല നൽകിയത്. യുവജനോത്സവത്തിൽ എൽസ പങ്കെടുത്തിരുന്നില്ല. എന്നാൽ മലയാളം സ്കിറ്റിൽ ഒന്നാം സ്ഥാനവും എ ഗ്രേഡും ലഭിച്ചന്നൊണ് സർവ്വകലാശാല നൽകിയ വ്യാജ സർട്ടിഫിക്കേറ്റിൽ ഉള്ളത്. പരീക്ഷയുടെ ഗ്രേസ് മാർക്കുമായി ബന്ധപ്പെട്ട രേഖകളിൽ ഇതും ഉൾപ്പെടുത്തിയിട്ടുണ്ട്.
സംഭവത്തിൽ സർവ്വകലാശാലയ്ക്കെതിരെ എൽസ പങ്കെടുത്തെന്നു പറയുന്ന സ്കിറ്റിലെ വിജയികളാണ് രംഗത്ത് വന്നിരിക്കുന്നത്. എസ്എഫ്ഐ നേതാവിന് വ്യാജ സർട്ടിഫിക്കേറ്റ് നൽകിയ സംഭവത്തിൽ വിസിയുടെ പങ്ക് അന്വേഷിക്കണമെന്ന് ആവശ്യപ്പെട്ടാണ് വിദ്യാർത്ഥികൾ കത്ത് നൽകിയിരിക്കുന്നത്. എൽസ സ്കിറ്റിൽ തങ്ങൾക്കൊപ്പം പങ്കെടുക്കുകയോ അണിയറയിൽ പ്രവർത്തിക്കുകയോ ചെയ്തിട്ടില്ല. എന്നിട്ടും വിദ്യാർത്ഥിനിയ്ക്ക് സർട്ടിഫിക്കേറ്റ് നൽകിയ സംഭവത്തിൽ അന്വേഷണം വേണമെന്നും ഗവർണർക്ക് നൽകിയ കത്തിൽ ആവശ്യപ്പെടുന്നു.
