പാലക്കാട് : പാലക്കാട് സിപിഎം ലോക്കൽ കമ്മറ്റി അംഗത്തിന്റെ കൊലപാതകത്തിന് പിന്നിൽ സിപിമ്മുകാർ തന്നെയെന്ന് ബിജെപി. മരുത റോഡ് സിപിഎം ലോക്കൽ കമ്മിറ്റി അംഗം ഷാജഹാൻ(40) ആണ് കൊല്ലപ്പെട്ടത്. രണ്ടു വിഭാഗങ്ങൾ തമ്മിലുള്ള സംഘർഷമാണ് കൊലപാതകത്തിന് കാരണമെന്ന് ബിജെപി സംസ്ഥാന ജനറൽ സെക്രട്ടറി സി.കൃഷ്ണകുമാർ പറഞ്ഞു.
ഇന്ന് രാത്രി 9.15 ഓടെ മലമ്പുഴ കുന്നംങ്കാട് വെച്ചായിരുന്നു സംഭവം. സ്വാതന്ത്ര്യ ദിനത്തിന്റെ അലങ്കാര പണികൾ നടക്കുന്നതിനിടെ ആയിരുന്നു ആക്രമണം. ബൈക്കിലെത്തിയ രണ്ടംഗ സംഘമാണ് ഷാജഹാനെ വെട്ടിയത്. കാലിലും ശരീരത്തിലും മാരകമായി വെട്ടേറ്റ ഷാജഹാനെ ആശുപത്രിയിലെത്തിക്കുന്നതിന് മുമ്പ് തന്നെ മരണം സംഭവിച്ചിരുന്നു.
കൊലപാതകത്തെ അപലപിക്കുന്നു എന്ന് സി.കൃഷ്ണകുമാർ പറഞ്ഞു. കൊലപാതകത്തിന് പിന്നിൽ സിപിഎമ്മുകാർ തന്നെയാണ്. ബിജെപിയുടെയോ, ആർഎസ്എസിന്റെയോ തലയിൽ കെട്ടി വെക്കാനുള്ള മലമ്പുഴ എം.എൽ.എയുടെ ശ്രമം അംഗീകരിക്കാനാവില്ല. കൊലപാതകികളിൽ ഒരാൾ ആർഎസ്എസ് പ്രവർത്തകനായ ആറുച്ചാമിയെ കൊന്ന കേസിലെ പ്രതിയാണ്. സിപിഎമ്മുകാർ തമ്മിലുള്ള സംഘർഷം ആർഎസ്എസിന്റെ മേൽ ചാരാനുള്ള ഗൂഢ ശ്രമം ആണ് മലമ്പുഴ എംഎൽഎ നടത്തുന്നത് എന്നും അദ്ദേഹം ആരോപിച്ചു.
