സ്‌പെയിൻ : അവധി ആഘോഷത്തിനിടെ സ്‌പെയിനിൽ സ്വാതന്ത്ര്യദിനം കൊണ്ടാടി വിഘ്‌നേഷ് നയൻതാര ദമ്പതികൾ. രാജ്യം 76-ാം സ്വാതന്ത്ര്യദിനം ആഘോഷിക്കുന്ന ദിവസം വിദേശരാജ്യത്തെ നഗരവീഥികളിലൂടെ ഇന്ത്യൻ പതാകയേന്തി നടന്നാണ് താരങ്ങൾ സ്വാതന്ത്ര്യദിനം ആർഭാടമാക്കിയത്. ത്രിവർണ്ണ പതാക ഉയർത്തിപ്പിടിച്ച് ബാർസിലോനയിലൂടെ നടക്കുന്ന ഇവരുടെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്. ഏത് രാജ്യത്ത് പോയാലും ദേശസ്നേഹം എന്നും ഉയർത്തിപ്പിടിക്കണമെന്ന സന്ദേശമാണ് വിഘ്‌നേഷും നയൻതാരയും വീഡിയോയിലൂടെ നൽകുന്നത്.
സ്വാതന്ത്ര്യത്തിന്റെ 75 ാം വാർഷികത്തിൽ എല്ലാ സഹോദരീസഹോദരന്മാർക്കും സ്വാതന്ത്ര്യദിനാശംസകൾ നേരുന്നുവെന്ന് വീഡിയോ പങ്കുവെച്ചുകൊണ്ട് വിഘ്‌നേഷ് കുറിച്ചു. ലോകമെമ്പാടുമുള്ള എല്ലാ ഇന്ത്യക്കാർക്കും ആശംസകൾ. നമുക്ക് ഈ ദിവസം അഭിമാനത്തോടെയും സന്തോഷത്തോടെയും ആഘോഷിക്കാം! ഒരു ഇന്ത്യൻ പൗരനെന്ന നിലയിൽ നാമെല്ലാവരും അനുഗ്രഹിക്കപ്പെട്ടവരാണ്. ലോകത്തിലെ ഏറ്റവും സ്വതന്ത്രവും സുരക്ഷിതവും ജനാധിപത്യപരവും സന്തുഷ്ടവുമായ വീട് നമ്മുടെ രാജ്യമാണൈന്നും വിഘ്‌നേഷ് കുറിച്ചു.
ഏറെ നാളത്തെ പ്രണയത്തിന് ശേഷം അടുത്തിടെയാണ് ഇരുവരും വിവാഹിതരായത്. തുടർന്ന് ജോലിത്തിരക്കെല്ലാം പൂർത്തിയാക്കിയ ശേഷമാണ് താരങ്ങൾ അവധി ആഘോഷിക്കാനായി സ്‌പെയിനിലേക്ക് പോയത്. അവിടെയെത്തി പങ്കുവെച്ച ഇരുവരുടെയും ചിത്രങ്ങളും സമൂഹമാദ്ധ്യമങ്ങളിൽ ശ്രദ്ധ നേടിയിരുന്നു.
