ന്യൂഡൽഹി: ജന്മാഷ്ടമി ദിനത്തിൽ ഇന്ത്യയിലെ ഹിന്ദു വിശ്വാസികളുടെ ആഘോഷത്തിൽ പങ്കുകൊണ്ട് ബ്രിട്ടീഷ് സ്ഥാനപതി അലക്സ് എല്ലിസ്. ഡൽഹിയിലെ ഇസ്കോൺ ക്ഷേത്രത്തിൽ ദർശനം നടത്തി. അദ്ദേഹത്തിന്റെ ക്ഷേത്ര ദർശനത്തിന്റെ ചിത്രങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
രാവിലെയോടെയായിരുന്നു അദ്ദേഹം ക്ഷേത്രത്തിൽ എത്തിയത്. പ്രാർത്ഥിച്ചതിന് പുറമേ അഭിഷേകമുൾപ്പെടെയുള്ള വഴിപാടുകളും അർപ്പിച്ചതിന് ശേഷമായിരുന്നു അദ്ദേഹം ക്ഷേത്രത്തിൽ നിന്നും മടങ്ങിയത്. ക്ഷേത്രം അധികൃതരുമായി അദ്ദേഹം സംസാരിച്ചു. എല്ലാ ഇന്ത്യക്കാർക്കും അദ്ദേഹം ജന്മാഷ്ടമി ആശംസകളും നേർന്നു.
ജന്മാഷ്ടമി ദിനത്തിൽ ഇസ്കോൺ ക്ഷേത്രത്തിൽ ദർശനം നടത്താൻ സാധിച്ചത് വലിയ സൗഭാഗ്യമായി കാണുന്നുവെന്ന് എല്ലിസ് പറഞ്ഞു. എല്ലാവർക്കും ജന്മാഷ്ടമി ആശംസകൾ. ഇന്ത്യയും ബ്രിട്ടനും തമ്മിലുള്ള ബന്ധം സുദൃഢമാണെന്നും അദ്ദേഹം പറഞ്ഞു.
ക്ഷേത്ര ദർശനത്തിന് ശേഷം അദ്ദേഹം തന്നെയാണ് ചിത്രങ്ങൾ സമൂഹമാദ്ധ്യമങ്ങളിൽ പങ്കുവെച്ചത്. ഈ ചിത്രങ്ങൾ നിമിഷ നേരങ്ങൾ കൊണ്ടുതന്നെ വൈറൽ ആയി. നിരവധി പേർ അദ്ദേഹത്തിന്റെ ചിത്രങ്ങൾക്ക് താഴെ ആശംസകൾ നേർന്നു. കഴിഞ്ഞ ദിവസം ബ്രിട്ടീഷ് പ്രധാനമന്ത്രി സ്ഥാനാർത്ഥി ഋഷി സുനകും അദ്ദേഹത്തിന്റെ ഭാര്യയും ഇസ്കോൺ ക്ഷേത്രത്തിൽ ദർശനം നടത്തിയിരുന്നു.
