ന്യൂഡൽഹി: ബംഗ്ലാദേശ് പ്രധാനമന്ത്രി ഷെയ്ഖ് ഹസീന സെപ്റ്റംബർ ആദ്യവാരം ഇന്ത്യ സന്ദർശിച്ചേക്കും. പ്രധാനമന്ത്രി നരേന്ദ്രമോദിയുടെ ക്ഷണപ്രകാരമാണ് സെപ്തംബർ അഞ്ചിന് അവർ ഇന്ത്യയിലെത്തുന്നത്. നാല് ദിവസത്തോളം അവർ ഇന്ത്യയിലുണ്ടാകും.
ഇക്കഴിഞ്ഞ ജൂണിലാണ് ഇന്ത്യ സന്ദർശിക്കാനായി പ്രധാനമന്ത്രി ഷെയ്ഖ് ഹസീനയെ ഔദ്യോഗികമായി ക്ഷണിച്ചത്. രാജ്യത്തെ വിവിധ ഇടങ്ങളിൽ സന്ദർശനം നടത്തുന്നതിനൊപ്പം പ്രധാനമന്ത്രി, മറ്റ് രാഷ്‌ട്രീയ നേതാക്കൾ തുടങ്ങിയവരുമായി കൂടിക്കാഴ്ചയും നടത്തും.
ഷെയ്ഖ് ഹസീനയുടെ സന്ദർശനത്തിന് മുന്നോടിയായി അവരുടെ പ്രസ് സെക്രട്ടറി ഇഹ്സാനുൽ കരീം ഡൽഹിയിലെത്തുന്നുണ്ട്. 2019ലാണ് ഷെയ്ഖ് ഹസീന അവസാനമായി ഇന്ത്യ സന്ദർശിച്ചത്.
