മുംബൈ: മഹാരാഷ്ട്രയിൽ തലയ്ക്ക് വൻ പാരിതോഷികം പ്രഖ്യാപിച്ച കമ്യൂണിസ്റ്റ് ഭീകരർ അറസ്റ്റിൽ. നിരവധി ക്രിമിനൽ കേസുകളിലെ പ്രതികളായ രമേഷ് പല്ലോ (29), ഷാഷി പുൻഗട്ടി, മഹേഷ് നരോട്ടെ എന്നിവരാണ് അറസ്റ്റിലായത്. ഇവരുടെ പക്കൽ നിന്നും ആയുധങ്ങളും പിടിച്ചെടുത്തു.
കൊയാർ വന മേഖലയിലും, ഝർവേദ ഗ്രാമത്തിലും നടത്തിയ ഭീകര വിരുദ്ധ പ്രവർത്തനങ്ങൾക്കിടെയാണ് മൂവരും പിടിയിലായത്. പ്രദേശങ്ങളിൽ ഭീകരരുടെ സാന്നിദ്ധ്യമുള്ളതായി പ്രദേശവാസികളിൽ ചിലർ പോലീസിനെ അറിയിച്ചിരുന്നു. ഇതിന്റെ ഭാഗമായാണ് പോലീസ് പ്രദേശങ്ങളിൽ എത്തി പരിശോധന നടത്തിയത്. ഇതിനിടെ രക്ഷപ്പെടാൻ ശ്രമിച്ച കമ്യൂണിസ്റ്റ് ഭീകരരെ അതിസാഹസികമായി പിടികൂടുകയായിരുന്നു.
കൊലപാതകം ഉൾപ്പെടെയുള്ള കേസുകളാണ് സംസ്ഥാനത്തെ വിവിധ പോലീസ് സ്റ്റേഷനുകളിലായി ഇവർക്കെതിരെ രജിസ്റ്റർ ചെയ്തിട്ടുള്ളത്. പോലീസിന് സ്ഥിരം തലവേദനയാകുന്ന രമേഷ്, മഹേഷ് എന്നിവരുടെ തലയ്ക്ക് നാല് ലക്ഷം രൂപ വീതവും, ഷാഷി പുൻഗട്ടിയുടെ തലയ്ക്ക് രണ്ട് ലക്ഷം രൂപയുമാണ് വിലയിട്ടിരുന്നത്.
