ന്യൂഡൽഹി: ഡൽഹി മുഖ്യമന്ത്രി അരവിന്ദ് കെജ്രിവാളിനെതിരെ രൂക്ഷവിമർശനവുമായി സാമൂഹ്യപ്രവർത്തകൻ അണ്ണാ ഹസാരെ. കെജ്രിവാൾ അധികാരത്തിന്റെ ലഹരിയിലാണെന്ന് അദ്ദേഹം കുറ്റപ്പെടുത്തി. മദ്യം പോലെ അധികാരവും ലഹരിയാണ്. നിങ്ങൾ അധികാരത്തിന്റെ ലഹരിയിലാണെന്ന് അണ്ണാ ഹസാരെ അരവിന്ദ് കെജ്രിവാളിന് അയച്ച കത്തിൽ വിമർശിക്കുന്നു.
നിങ്ങൾ മുഖ്യമന്ത്രിയായതിന് ശേഷം ആദ്യമായാണ് ഒരു കത്ത് എഴുതുന്നത്. കാരണം നിങ്ങളുടെ മദ്യനയത്തിൽ അങ്ങേയറ്റം വേദനയുണ്ട് ,എന്ന് ആരംഭിക്കുന്ന കത്തിൽ ഡൽഹി മുഖ്യമന്ത്രിയ്ക്കെതിരെയും മദ്യനയത്തിനെതിരെയും അണ്ണാഹസാരെ വിമർശനം ഉന്നയിക്കുന്നുണ്ട്.
”നിങ്ങളുടെ സ്വരാജ് എന്ന പുസ്തകത്തിൽ മദ്യനയത്തെ കുറിച്ച് വളരെ മനോഹരമായി തന്നെ എഴുതി. എന്നെ കൊണ്ട് അവതാരിക എഴുതിച്ചു. എന്നാലിന്ന് മുഖ്യമന്ത്രിയായതിന് ശേഷം താങ്കൾ ആദർശങ്ങളെല്ലാം മറന്നുവെന്ന്”അണ്ണാ ഹസാരെ കത്തിൽ കുറ്റപ്പെടുത്തുന്നു.
അതേസമയം എക്സൈസ് നയവുമായി ബന്ധപ്പെട്ട അഴിമതിക്കേസിൽ ഡൽഹി ഉപമുഖ്യമന്ത്രി മനീഷ് സിസോദിയ ഉൾപ്പെടെ 15 പ്രതികൾ അന്വേഷണം നേരിടുകയാണ്. മനീഷ് സിസോദിയയുടെ വസതികളിലും മറ്റും സിബിഐ നടത്തിയ റെയ്ഡിൽ മദ്യനയ അഴിമതിയുമായി ബന്ധപ്പെട്ട നിർണായക തെളിവുകൾ കണ്ടെത്തിയിരുന്നു.
