ബാലവേല നമ്മുടെ രാജ്യത്ത് നിയമവിരുദ്ധമാണ്. കുഞ്ഞുങ്ങളെ കൊണ്ട് ജോലിയെടുപ്പിക്കുന്നത് ജയിലിലേക്കുള്ള വഴി ഒരുക്കുമെന്ന് ചുരുക്കം. എന്നാൽ അങ്ങ് ജപ്പാനിൽ കുഞ്ഞുങ്ങളെ കാത്ത് അസ്സൽ സർക്കാർ ജോലിയാണ് ഒരുങ്ങുന്നത്. ജോലി ചെയ്യുന്ന കുഞ്ഞുങ്ങൾക്ക് ആകർഷകമായ ശമ്പളവുമുണ്ട്. നാലു വയസുവരെയുള്ള കുഞ്ഞുങ്ങളെയാണ് ജോലിയ്ക്കായി എടുക്കുന്നത്
സതേൺ ജപ്പാനിലെ ഒരു നഴ്സിംഗ് ഹോമിലേക്കാണ് കുഞ്ഞുങ്ങളെ ജോലിയ്ക്ക് നിയമിക്കുന്നത്.ഇവരുടെ ജോലി എന്താണന്നല്ലേ. നഴ്സിംഗ് ഹോമിലെ പ്രായമായ അന്തേവാസികൾക്കൊപ്പം സമയം ചിലവഴിക്കണം. കളിച്ചും ചിരിച്ചും അവരെ രസിപ്പിക്കണം. അങ്ങനെ കമ്പനി ഒക്കെ കൊടുത്തിരുന്നാൽ മാത്രം മതി. ജോലിയ്ക്ക് ശമ്പളമായി നൽകുന്നതാകട്ടെ നാപ്കിനും പാൽപ്പൊടിയും.
ജോലിയുടെ പരസ്യം കണ്ട് മുപ്പത് കുട്ടികളുടെ മാതാപിതാക്കളാണ് തയ്യാറായി ഇതുവരെ വന്നിട്ടുള്ളത്. രക്ഷിതാക്കളോടൊപ്പം ആണ് കുട്ടികൾ നഴ്സിംഗ് ഹോമിൽ എത്തേണ്ടത്. കുട്ടികളോടൊപ്പം എപ്പോഴും അമ്മമാർക്ക് നിൽക്കാം.
കുട്ടികൾ അവരുടെ മൂഡിന് അനുസരിച്ച് മാത്രം ജോലി ചെയ്താൽ മതിയാകും. വിശക്കുമ്പോൾ ഭക്ഷണം കഴിക്കാം ഉറക്കം വരുമ്പോൾ ഉറങ്ങാം. അങ്ങനെ അവരുടെ ഇഷ്ടാനുസരണം എല്ലാം ചെയ്യാം. ഇതിനിടയിലെ സമയങ്ങളിൽ മാത്രം അന്തേവാസികൾക്കൊപ്പം ചിലവഴിച്ചാൽ മതിയാകും. ഒരു പാർക്കിൽ വരുന്നതുപോലെ വന്നു പോകാം എന്നാണ് നഴ്സിങ്ങ് ഹോം അധികൃതർ പറയുന്നത്.
Comments