ന്യൂഡൽഹി: നിതീഷ് കുമാറിനെതിരെ പരിഹാസം കലർന്ന വിമർശനവുമായി രാഷ്‌ട്രീയ നിരീക്ഷകൻ പ്രശാന്ത് കിഷോർ. ആർജെഡി നേതാവ് തേജസ്വി യാദവിനോടൊപ്പം ഫോട്ടോക്ക് പോസ് ചെയ്തു എന്ന് കരുതി നിതീഷ് കുമാറിനെ വിശ്വസിക്കാനാവില്ല. അയാൾ എപ്പോൾ ആർക്കൊപ്പം നിൽക്കുമെന്ന് അയാൾക്ക് പോലും അറിയില്ല എന്നതാണ് വാസ്തവമെന്നും പ്രശാന്ത് കിഷോർ പറഞ്ഞു.
നിതീഷിന്റെ ചുവടുമാറ്റം ദേശീയ രാഷ്‌ട്രീയത്തിൽ കാര്യമായ ചലനമുണ്ടാക്കാൻ സാദ്ധ്യതയില്ലെന്ന് ദേശീയ മാദ്ധ്യമത്തിന് നൽകിയ അഭിമുഖത്തിൽ പ്രശാന്ത് കിഷോർ പറഞ്ഞു. നിലവിൽ നിതീഷ് കുമാറിന്റെ നിലപാട് മാറ്റം ബിഹാർ രാഷ്‌ട്രീയത്തിൽ മാത്രം ചെറുചലനങ്ങൾ സൃഷ്ടിക്കാൻ ഉതകുന്നതാണെന്നും അദ്ദേഹം കൂട്ടിച്ചേർത്തു.
ബിഹാറിലെ അടുത്ത നിയമസഭാ തിരഞ്ഞെടുപ്പ് സഖ്യങ്ങൾ ഇപ്പോൾ പ്രവചിക്കാൻ സാധിക്കില്ല. ഒരുവശത്ത് ബിജെപിയും മറുവശത്ത് പ്രതിപക്ഷ പാർട്ടികൾ ഒരുമിച്ചുള്ള സഖ്യവും എന്നത് പലർക്കും ചിന്തിച്ച് ആസ്വദിക്കാൻ പറ്റുന്ന കാര്യമാണ്. എന്നാൽ അത് യാഥാർത്ഥ്യത്തിൽ നിന്നും ഇപ്പോഴും ഏറെ അകലെയാണ്. ബിഹാറിലെ നിലവിലെ രാഷ്‌ട്രീയ സാഹചര്യത്തിൽ, കാതലായ മാറ്റങ്ങൾക്ക് സാദ്ധ്യതയുണ്ടെന്നും പ്രശാന്ത് കിഷോർ പറഞ്ഞു.
