ന്യൂഡൽഹി: സിനിമാ ചിത്രീകരണ രംഗത്തേക്ക് ചുവടുവെച്ച് സമൂഹമാദ്ധ്യമമായ വാട്‌സ് ആപ്പ്. ആദ്യമായി ചിത്രീകരിച്ച ഹ്രസ്വ ചിത്രം ഈ മാസം 21 ന് ഓൺലൈൻ പ്ലാറ്റ്‌ഫോമുകളിലൂടെ റിലീസ് ചെയ്യും. ‘നൈജ ഒഡീസി’ എന്നാണ് വാട്‌സ് ആപ്പ് നിർമ്മിച്ച ചിത്രത്തിന്റെ പേര്.
ട്വിറ്ററിലൂടെയാണ് വാട്‌സ് ആപ്പ് പുതിയ മേഖലയിലേക്ക് ചുവടുവയ്‌ക്കുന്നകാര്യം ഔദ്യോഗികമായി അറിയിച്ചത്. 12 മിനിറ്റ് ദൈർഘ്യമുള്ള ചിത്രം ആമസോൺ പ്രൈം, യൂട്യൂബ് എന്നിവയിലൂടെയാണ് സംപ്രേഷണം ചെയ്യുക. പ്രശസ്ത ബാസ്‌ക്കറ്റ് ബോൾ താരം ഗിയാന്നിസ് ആന്റിറ്റോകൗൺമ്പോയുടെ ജീവിതമാണ് സിനിമയുടെ പ്രമേയം.
അടുത്തിടെ ആന്റിറ്റോകൗൺമ്പോ വാട്‌സ് ആപ്പുമായി ചില കരാറുകളിൽ ഏർപ്പെട്ടിരുന്നു. ഇതിന് പിന്നാലെയാണ് അദ്ദേഹത്തിന്റെ ജീവതകഥ തന്നെ ഹസ്ര്വചിത്രമായി പുറത്തിറക്കിയിരിക്കുന്നത്. നമ്മുടെ ജീവിതത്തിന്റെ വ്യത്യസ്ത ഭാവങ്ങളെ എങ്ങനെയാണ് വാട്‌സ് ആപ്പ് സ്വാധീനിക്കുന്നത് എന്നാണ് നൈജ ഒഡീസിയിലൂടെ സമൂഹമാദ്ധ്യമം ആവിഷ്‌കരിച്ചിരിക്കുന്നത് എന്നാണ് റിപ്പോർട്ടുകൾ. ഗ്രീക്ക് ഇതിഹാസമായ ദി ഒഡീസിയിൽ നിന്നും പ്രചോദനം ഉൾക്കൊണ്ടാണ് ചിത്രം നിർമ്മിച്ചിരിക്കുന്നത്.
Comments