തിരുവനന്തപുരം : കോൺഗ്രസ് അദ്ധ്യക്ഷ തിരഞ്ഞെടുപ്പിൽ തരൂരിനെ തള്ളി കെ മുരളീധരനും. തന്റെ വോട്ട് മല്ലികാർജ്ജുൻ ഖാർഗെക്കാണെന്ന് അദ്ദേഹം പറഞ്ഞു. സാധാരണക്കാരെ മനസിലാക്കുന്ന നേതാവാണ് കോൺഗ്രസിൽ അദ്ധ്യക്ഷനായി വരേണ്ടത്. തരൂരിന് സാധാരണക്കാരുമായി ചേർന്നുള്ള പ്രവർത്തന പരിചയം കുറവാണെന്നും അദ്ദേഹം പറഞ്ഞു.
ഇത്തവണത്തെ തിരഞ്ഞെടുപ്പിൻ നെഹ്റു കുടുംബം വിട്ടുനിൽക്കുന്നു എന്നതാണ് പ്രത്യേകത. എല്ലാ പ്രശ്നങ്ങൾക്കും പരിഹാരം തിരഞ്ഞെടുപ്പാണ് . തരൂരിന്റെ ചില നിർദ്ദേശങ്ങളോട് യോജിക്കുന്നു. അംഗങ്ങൾക്ക് ആർക്ക് വേണമെങ്കിലും വോട്ട് ചെയ്യാം എന്നാൽ തന്റെ വോട്ട് ഖാർഗെക്കാണ്. പ്രായം കൂടുതലുള്ളതൊന്നും അയോഗ്യതയല്ലെന്നും അദ്ദേഹം വ്യക്തമാക്കി.
അതേസമയം ഖാർഗെയ്ക്ക് പിന്തുണയുമായി രമേശ് ചെന്നിത്തലയും രംഗത്തെത്തിയിരുന്നു. ഇതിന്റെ ഭാഗമായി ഗുജറാത്ത്, മഹാരാഷ്ട്ര , തെലുങ്കാന എന്നീ ഇടങ്ങളിൽ ഖാർഗെയ്ക്ക് വേണ്ടി പ്രചാരണത്തിനിറങ്ങാനാണ് ചെന്നിത്തലയുടെ തീരുമാനം.
നിലവിൽ പാർട്ടിക്കുള്ളിലെ ഭിന്നിപ്പുകൾക്ക് ചെവി കൊടുക്കാതെ തിരഞ്ഞെടുപ്പിനെ ശക്തമായി നേരിടാനാണ് തരൂരിന്റെ നീക്കം . മുതിർന്ന നേതാക്കൾ ഇടഞ്ഞ് നിൽക്കുന്ന സാഹചര്യത്തിൽ കേരളത്തിൽ നിന്ന് പരമാവധി വോട്ടുകൾ നേടാനാണ് അദ്ദേഹം ശ്രമിക്കുന്നത്. ഇതിനായി യുവനേതാക്കളെയാണ് തരൂർ മുന്നിൽ നിർത്തിയിരിക്കുന്നത്. കേരളത്തിന് പുറത്ത് നിന്ന് തനിക്ക് മതിയായ വോട്ടുകൾ ലഭിക്കും എന്നാണ് തരുരിന്റെ വിശ്വാസം.
