ഡൽഹി: ശുദ്ധമായ ഊർജ്ജ പരിവർത്തനം പ്രോത്സാഹിപ്പിക്കുന്നതിന്റെയും കാർബൺ ന്യൂട്രാലിറ്റി ലക്ഷ്യങ്ങൾ കൈവരിക്കുന്നതിന്റെയും ഭാഗമായി ഹരിത ഹൈഡ്രജൻ വികസിപ്പിക്കുന്നതിനായി ഇന്ത്യയും ഫ്രാൻസും സഹകരിക്കുന്നു. ഡീകാർബണൈസ്ഡ് ഹൈഡ്രജനായി വിശ്വസനീയവും സുസ്ഥിരവുമായ മൂല്യ ശൃംഖല സ്ഥാപിക്കുന്നതിനായി ഫ്രഞ്ച്- ഇന്ത്യൻ ഹൈഡ്രജൻ ആവാസവ്യവസ്ഥകളെ ഒരുമിച്ച് കൊണ്ടുവരാനാണ് പുതിയ സഹകരണം ലക്ഷ്യമിടുന്നതെന്ന് ഫ്രഞ്ച് എംബസി പറഞ്ഞു. വികസനത്തിനും അന്തർദേശീയ പങ്കാളിത്തത്തിനും വേണ്ടി ഫ്രഞ്ച് സഹമന്ത്രി ക്രിസൗല സച്ചറോ പൗലോയും ഇന്ത്യയുടെ ഊർജ്ജ മന്ത്രി ആർ.കെ.സിംഗും ചേർന്ന് പുതിയ പദ്ധതി രേഖ പുറത്തിറക്കി.
ഇന്ത്യ-ഫ്രഞ്ച് പങ്കാളിത്തത്തിൽ മഹത്തായ ഒരു പുതിയ അദ്ധ്യായം തുറക്കുന്നതിൽ ഞാൻ അഭിമാനിക്കുന്നു. ഭാവിയിലെ ഡീകാർബണൈസ്ഡ് ഹൈഡ്രജൻ വ്യവസായത്തിന് ശക്തിപകരാൻ ഫ്രാൻസും ഇന്ത്യയും കൈകോർക്കുന്നു. പുതിയ സഹകരണം ശുദ്ധമായ ഊർജ്ജ പരിവർത്തനം ത്വരിതപ്പെടുത്തുന്നതിനും കാർബൺ ന്യൂട്രാലിറ്റി ലക്ഷ്യങ്ങൾ കൈവരിക്കുന്നതിനും സഹായിക്കുമെന്ന് ഫ്രഞ്ച് മന്ത്രി പറഞ്ഞു. കാർബൺ കുറഞ്ഞ ഒരു ഭാവിയിലേക്കുള്ള ഇരു രാജ്യങ്ങളുടെയും പ്രതിബദ്ധതയുടെ ശക്തമായ സന്ദേശമാണ് ഇതെന്നും ക്രിസൗല വ്യക്തമാക്കി.
ദേശീയ ഹൈഡ്രജൻ തന്ത്രങ്ങൾ ഇരു രാജ്യങ്ങളും സ്വീകരിച്ചിരിക്കുന്നതിനാൽ ഡീകാർബണൈസ്ഡ് ഹൈഡ്രജന് അപാരമായ സാധ്യതകളുണ്ടെന്ന് ഇരു രാജ്യങ്ങളും വിശ്വസിക്കുന്നതായി ഫ്രഞ്ച് എംബസി പറഞ്ഞു. മെയ് 4 ന്, പാരീസിൽ നടന്ന കൂടിക്കാഴ്ചയുടെ അവസരത്തിൽ, പ്രസിഡന്റ് ഇമ്മാനുവൽ മാക്രോണും പ്രധാനമന്ത്രി നരേന്ദ്ര മോദിയും ഡീകാർബണൈസ്ഡ് ഹൈഡ്രജനായി ഉഭയകക്ഷി സഹകരണം ദൃഢമാക്കാൻ തീരുമാനം കൈക്കൊണ്ടിരുന്നു.
Comments