ഡിസ്‌നി: ടി20 ലോകകപ്പിൽ അർദ്ധ സെഞ്ച്വറിയോടെ രോഹിത് ശർമ്മയുടെ തിരിച്ചു വരവിനാണ് ആരാധകർ സാക്ഷ്യം വഹിച്ചത്. കുറച്ചു നാളുകളായി ക്രീസിൽ ഉറച്ചു നിൽക്കാൻ കഴിയാതെ ആരാധകരെയും ക്രിക്കറ്റ് പ്രേമികളെയും രോഹിത് നിരാശയുടെ വക്കിൽ എത്തിച്ചിരുന്നു. എന്നാൽ നെതർലൻഡ്‌സിനെതിരായ മത്സരത്തിൽ രോഹിത് 53 റണ്‍സ് നേടിയ സന്തോഷത്തിലാണ് ആരാധകർ. എന്നാൽ ചെറിയൊരു സന്തോഷത്തിൽ മാത്രം ആ ആവേശം ഒതുങ്ങുന്നില്ല. ട്വിന്റി20 ലോകകപ്പിൽ ഒരു ഇന്ത്യൻ റെക്കോർഡു കൂടിയാണ് താരം സ്വന്തമാക്കിയിരിക്കുന്നത്.
യുവരാജ് സിംഗിന്റെ റെക്കോർഡാണ് രോഹിത്ത് ശർമ്മ മറികടന്നിരിക്കുന്നത്. പത്താം ഓവറില്‍ ബാസ് ഡി ലീഡിനെതിരെ സിക്സര്‍ നേടിയതോടെ ടി20 ലോകകപ്പില്‍ രോഹിത് നേടിയ സിക്സുകളുടെ എണ്ണം 34 ആയി. ഇതിന് മുമ്പ് ടി20 ലോകകപ്പില്‍ ഏറ്റവും കൂടുതൽ സിക്സറുകൾ നേടിയത് യുവരാജ് സിംഗ് ആയിരുന്നു. 33 സിക്സറാണ് യുവരാജ് നേടിയത്.
ആദ്യ ടി20 ലോകകപ്പില്‍ ഇംഗ്ലണ്ടിന്റെ സ്റ്റുവര്‍ട്ട് ബ്രോഡിന്‍റെ ഒരു ഓവറിൽ ആറ് സിക്സറുകൾ പറത്തി യുവി റെക്കോര്‍ഡിട്ടിരുന്നു. 24 സിക്സുകള്‍ നേടിയിട്ടുള്ള വിരാട് കോഹ്ലിയാണ് ഇന്ത്യന്‍ താരങ്ങളില്‍ മൂന്നാം സ്ഥാനത്തുള്ളത്. 2007-ൽ ആരംഭിച്ച ടി20 ലോകകപ്പിന്റെ എല്ലാ സീസണിലും കളിച്ചിട്ടുള്ള ഏക ഇന്ത്യൻ ക്രിക്കറ്റ് താരവുമാണ് രോഹിത്. എന്നാല്‍ ലോകകപ്പിലെ സിക്സര്‍ നേട്ടത്തില്‍ ഒന്നാമൻ വെസ്റ്റ് ഇന്‍ഡീസ് താരം ക്രിസ് ഗെയിലാണ്. താരത്തിന്റെ അടുത്തുപോലും ആരും എത്തിയിട്ടില്ല എന്നതാണ് സത്യം. 63 സിക്സുകളാണ് ഗെയ്ല്‍ ലോകകപ്പില്‍ അടിച്ചു പറത്തിയത്.
