ശ്രീനഗർ: ജമ്മുകശ്മീരിൽ വീണ്ടും ഏറ്റുമുട്ടൽ. പൂഞ്ചിൽ നുഴഞ്ഞു കയറാൻ ശ്രമിച്ച മൂന്ന് ഭീകരരെ സൈന്യം വധിച്ചു.ഭീകരരിൽ നിന്ന് സൈന്യം ആയുധങ്ങളും പിടിച്ചെടുത്തു.
പൂഞ്ച് സെക്ടറിലെ നിയന്ത്രണരേഖയുടെ സമീപം ഭീകരർ നുഴഞ്ഞുകയറാൻ ശ്രമം നടക്കുന്നുണ്ടെന്ന് സൈന്യത്തിന് രഹസ്യവിവരം ലഭിച്ചു. ഭീകരരുടെ സാന്നിദ്ധ്യം ശ്രദ്ധയിൽപ്പെട്ടതോടെ തിരച്ചിൽ ആരംഭിച്ചു. ഇതോടെ ഭീകരർ സൈന്യത്തിന് നേരെ വെടിയുതിർക്കുകയായിരുന്നു. തുടർന്നുണ്ടായ ഏറ്റുമുട്ടലിലാണ് സൈന്യം ഭീകരരെ കൊലപ്പെടുത്തിയത്.
ഒരാളുടെ മൃതദേഹം കണ്ടെത്തിയതായി സൈന്യം അറിയിച്ചു. ഭീകരരിൽ നിന്ന് രണ്ട് എകെ 47 തോക്കുകളും ഒരു പിസ്റ്റളും കണ്ടെടുത്തു. മറ്റ് ഭീകരരുടെ മൃതദേഹം കണ്ടെടുക്കാനുള്ള ശ്രമം ആരംഭിച്ചിട്ടുണ്ട്. ഓപ്പറേഷൻ തുടരുകയാണെന്നും പ്രദേശത്ത് തിരച്ചിൽ നടക്കുന്നുണ്ടെന്നും സൈന്യം വ്യക്തമാക്കി. കഴിഞ്ഞ മൂന്ന് ദിവസത്തിനിടെ കശ്മീരിലെ വിവിധമേഖലകളിലായി ഏഴുപേരെ സൈന്യം വധിച്ചിരുന്നു.
