ബ്രസീലിയ : ഖത്തർ ലോകകപ്പ് ഫുട്‌ബോളിനുള്ള ബ്രസീൽ ടീമിനെ പ്രഖ്യാപിച്ചു. 26 അംഗ താരനിരയെ പരിശീലകൻ അഡ്‌നോർ ലിയാനാഡോ ബാച്ചി എന്ന ടിറ്റെയാണ് പ്രഖ്യാപിച്ചത്. തിയാഗോ സിൽവയാണ് ടീമിനെ നയിക്കുന്നത്. ഫിലിപ്പ് കുടിഞ്ഞ്യോയ്‌ക്ക് പരിക്കുമൂലം ഇടം ലഭിക്കാതെ പോയപ്പോൾ കസാമിറോ ടീമിലെത്തി.
ടീമിന്റെ ഗോളി ആലിസൺ ബക്കറാണ്. നെയ്മറിനൊപ്പം കാസമിറയെക്കൂടാതെ ഫിർമിന്യോ, ജെസ്യൂസ്, വിനീഷ്യസ്, റോഡ്രിഗോ, റിച്ചാർലിസൺ, മാർട്ടിനെല്ലി എന്നിവരാണ് പ്രധാനപ്പെട്ട താരങ്ങൾ. ഏറ്റവും മികച്ച താരങ്ങളാൽ സമൃദ്ധമായ ടീമിൽ ഒരോ മത്സരത്തിലും അവസാന 11 പേരെ തിരഞ്ഞെടുക്കുന്നതിൽ ട്വിറ്റേ വിയർക്കും. ഈ മാസം 20-ാം തിയതി നടക്കാനിരിക്കുന്ന ഖത്തർ ലോകകപ്പിനായിട്ടാണ് ഏറ്റവുമധികം ആരാധകരുള്ള രാജ്യം ടീമിനെ തിരഞ്ഞെടുത്തത്.
ആറാം തവണയും കിരീടം ഉയർത്തുമെന്ന് ഏറ്റവുമധികം പ്രതീക്ഷ നൽകുന്ന ടീമാണ് ബ്രസീൽ. ഏറ്റവുമധികം യുവതാരങ്ങളെ ലോകവേദിയിൽ അണിനിരത്തുന്നതും ബ്രസീലാണ്. എന്നാൽ ഓരോ താരത്തിനും പകരം വെയ്‌ക്കാൻ യുവനിര നിൽക്കേ ഓരോ കളിയിലും ആർക്കൊക്കെ അവസരം ലഭിക്കുമെന്ന ആശങ്കയാണ് ആരാധകർക്കുള്ളത്.
