മുംബൈ: അധിക്ഷേപ പരാമർശം നടത്തിയ രാഹുൽ ഗാന്ധിയ്ക്കെതിരെ നിയമ നടപടി സ്വീകരിക്കാൻ ഒരുങ്ങി വീരസവർക്കറുടെ കുടുംബം. പരാമർശത്തിൽ രാഹുൽ ഗാന്ധിയ്ക്കെതിരെ പരാതി നൽകുമെന്ന് സവർക്കറുടെ കൊച്ചു മകൻ രജ്ഞിത്ത് സവർക്കർ പറഞ്ഞു. സ്വാതന്ത്ര്യ സമര കാലത്ത് ആൻഡമാനിലെ ജയിലിൽ കിടന്നപ്പോൾ മോചിതനാകാൻ വേണ്ടി സവർക്കർ മാപ്പ് എഴുതി നൽകിയെന്ന് ആയിരുന്നു രാഹുൽ ഗാന്ധി പറഞ്ഞത്.
രാഹുൽ ഗാന്ധിയുടെ പരാമർശത്തെ ശക്തമായി എതിർക്കുന്നു. പരാമർശത്തിൽ ദാദർ പോലീസ് സ്റ്റേഷനിൽ രാഹുൽ ഗാന്ധിയ്ക്കെതിരെ പരാതി നൽകും. പരാമർശത്തിൽ കോൺഗ്രസ് നേതാവിനെതിരെ സംസ്ഥാന സർക്കാരും ശക്തമായ നടപടി സ്വീകരിക്കണമെന്നും രജ്ഞിത്ത് സവർക്കർ വ്യക്തമാക്കി.
മഹാരാഷ്ട്രയിൽ ഭാരത് ജോഡോ യാത്രയുടെ ഭാഗമായി സംസാരിക്കുന്നതിനിടെയായിരുന്നു രാഹുൽ ഗാന്ധി സവർക്കർക്കെതിരെ അധിക്ഷേപ പരാമർശം നടത്തിയത്. കത്ത് എഴുതി നൽകി എന്നതിന് പുറമേ ബ്രിട്ടീഷുകാരെ ഭയന്ന് അവർ വാഗ്ദാനം ചെയ്ത പെൻഷനും സ്വീകരിച്ചിരുന്നുവെന്നും രാഹുൽ ഗാന്ധി പറഞ്ഞിരുന്നു. ബ്രിട്ടീഷുകാരെ സവർക്കർ സഹായിച്ചതായും അദ്ദേഹം ആരോപിച്ചിരുന്നു.
അതേസമയം പരാമർശത്തിൽ രാഹുൽ ഗാന്ധിയ്ക്കെതിരെ ശക്തമായ പ്രതിഷേധമാണ് ഉയരുന്നത്. ഇതിനിടെയാണ് പരാതി നൽകുമെന്ന് കുടുംബം വ്യക്തമാക്കിയിരിക്കുന്നത്.
