ന്യൂഡൽഹി: ധീരദേശാഭിമാനി വീര സവർക്കറെ അധിക്ഷേപിക്കുന്ന കോൺഗ്രസിന് ചുട്ട മറുപടി നൽകാൻ അഖില ഭാരതീയ ഹിന്ദു മഹാസഭ. ഡൽഹിയിലെ കോൺഗ്രസ് ആസ്ഥാനത്തിന് മുൻപിൽ സംഘടന സവർക്കറുടെ പ്രതിമ സ്ഥാപിക്കും. ഹിന്ദു മഹാസഭാ ദേശീയ അദ്ധ്യക്ഷൻ സ്വാമി ചക്രപാണിയാണ് ഇക്കാര്യം വ്യക്തമാക്കിയത്.
സ്വാതന്ത്ര്യ സമര സേനാനികളെ അധിക്ഷേപിക്കുന്നതിൽ നിന്നും കോൺഗ്രസ് നേതാക്കളെ വിലക്കണമെന്ന് ആവശ്യപ്പെട്ട് പ്രധാനമന്ത്രി നരേന്ദ്ര മോദിയ്ക്ക് സ്വാമി ചക്രപാണി കത്ത് നൽകിയിരുന്നു. ഇതിലാണ് പ്രതിമ സ്ഥാപിക്കുമെന്ന പ്രഖ്യാപനം ഉള്ളത്. ബ്രിട്ടീഷുകാരനായ എഒ ഹ്യൂം രൂപം നൽകിയ കോൺഗ്രസ് പാർട്ടിയും, അതിന്റെ നേതാവായ രാഹുൽ ഗാന്ധിയും സ്വാതന്ത്ര്യ സമര സേനാനിയായ വീർ സവർക്കറെ വീണ്ടും വീണ്ടും അധിക്ഷേപിക്കുകയാണെന്ന് കത്തിൽ അദ്ദേഹം വ്യക്തമാക്കി. ബ്രിട്ടീഷുകാരുടെ ഭാഗമായി ഇരുന്നുകൊണ്ട് സ്വാതന്ത്ര്യ സമര സേനാനികളെ അധിക്ഷേപിക്കുന്ന രാഹുൽ ഗാന്ധിയും കോൺഗ്രസും വലിയ കുറ്റമാണ് ചെയ്യുന്നതെന്നും കത്തിൽ ചൂണ്ടിക്കാട്ടുന്നു.
ആഗ്രയിലെ മാനസികാരോഗ്യ കേന്ദ്രത്തിൽ എത്തിച്ച് രാഹുൽ ഗാന്ധിയ്ക്ക് ചികിത്സ നൽകണം. സ്വാതന്ത്ര്യ സമര സേനാനികളെ നിരന്തരം അപമാനിക്കുന്ന രാഹുൽ ഗാന്ധിയെ രാഷ്ട്രീയ പ്രവർത്തനങ്ങളിൽ നിന്നും വിലക്കണം. രാഹുൽ ഗാന്ധിയെ ജയിലിൽ അടയ്ക്കണമെന്നും സ്വാമി ചക്രപാണി ആവശ്യപ്പെട്ടു.
സവർക്കറുടെ ചരമവാർഷികമായ ഫെബ്രുവരി 26 ന് ഡൽഹിയിലെ കോൺഗ്രസ് ആസ്ഥാനത്ത് പ്രതിമ സ്ഥാപിക്കാൻ തീരുമാനിച്ചിട്ടുണ്ട്. എത്രയും വേഗം അക്ബർ റോഡ് വീർ സവർക്കർ റോഡ് എന്ന് പുന:ർനാമകരണം ചെയ്യണമെന്നും അദ്ദേഹം കത്തിൽ ആവശ്യപ്പെട്ടു.
