മുംബൈ: ഇന്ത്യൻ സൈന്യത്തിനെതിരെ അധിക്ഷേപ പരാമർശം നടത്തിയ നടി റിച്ച ഛദ്ദയെ പിന്തുണച്ച് കോൺഗ്രസ്. റിച്ചയ്‌ക്ക് പിന്തുണയുമായി എത്തിയിരിക്കുകയാണ് നടിയും കോൺഗ്രസ് മുംബൈ യൂണിറ്റ് വൈസ് പ്രസിഡന്റുമായ നഗ്മ. റിച്ചയുടെ കമന്റ് സൈന്യത്തെ അപമാനിക്കുന്നതായിരുന്നില്ല. മറിച്ച്, ബിജെപിയെ തിരഞ്ഞെടുപ്പിൽ സഹായിക്കാൻ രഷ്‌ട്രീയ പ്രസ്താവന നടത്തിയ ജനറലിനുള്ള മറുപടിയായിരുന്നു എന്ന അശോക് കുമാർ സിംഗ് എന്നയാളുടെ ട്വീറ്റിനെ അനുകൂലിച്ചാണ് നഗ്മ രംഗത്ത് വന്നത്. താങ്കൾ പറഞ്ഞത് തികച്ചും ശരിയാണ് എന്നായിരുന്നു നഗ്മയുടെ പ്രതികരണം.
സൈന്യത്തിനെതിരായ പരാമർശത്തിൽ റിച്ച ഛദ്ദ പിന്നീട് മാപ്പ് പറഞ്ഞിരുന്നു. ഇതിന് ശേഷവും അവരുടെ പരാമർശത്തെ അനുകൂലിച്ച് കോൺഗ്രസ് നേതാക്കൾ രംഗത്ത് വരുന്നത് എന്തിനാണെന്നായിരുന്നു ബിജെപിയുടെ ചോദ്യം.
പാക് അധീന കശ്മീർ തിരിച്ചു പിടിക്കാൻ സൈന്യം സജ്ജമാണെന്നും ഉന്നത ഉത്തരവിനായി കാക്കുകയാണെന്നുമുള്ള നോർത്തേൺ ആർമി കമാൻഡർ ലെഫ്റ്റ്നന്റ് ജനറൽ ഉപേന്ദ്ര ദ്വിവേദിയുടെ പ്രസ്താവനയ്‌ക്കെതിരെയായിരുന്നു റിച്ച ഛദ്ദയുടെ അവഹേളന ട്വീറ്റ്. ‘ഗാൽവൻ ഹായ് എന്ന് പറയുന്നു‘ എന്നായിരുന്നു ലെഫ്റ്റ്നന്റ് ജനറൽ ഉപേന്ദ്ര ദ്വിവേദിയുടെ ട്വീറ്റിന് റിച്ച നൽകിയ മറുപടി. ഇതിനെതിരെ ശക്തമായ വിമർശനം ഉയർന്നതോടെ അവർ ക്ഷാമപണം നടത്തുകയായിരുന്നു.
