ദോഹ: ഖത്തറിൽ കഴിഞ്ഞ ദിവസം നടന്ന ബ്രസീൽ- സെർബിയ മത്സരത്തിനിടെ ഗാലറിയിൽ എം എസ് ധോണിയുടെ ജേഴ്സിയുമായി ചെന്നൈ ആരാധകൻ. ധോണിയുടെ ജേഴ്സിയുമായി ബ്രസീൽ ആരാധകനോടൊപ്പം നിൽക്കുന്ന ചെന്നൈ സൂപ്പർ കിംഗ്സ് ആരാധകന്റെ ചിത്രമാണ് സാമൂഹിക മാദ്ധ്യമങ്ങളിൽ വൈറലാകുന്നത്. ജേഴ്സി ധരിച്ച് സ്റ്റേഡിയത്തിൽ നിൽക്കുന്ന ആരാധകന്റെ ചിത്രവും പ്രചരിക്കുന്നുണ്ട്.
അന്താരാഷ്‌ട്ര ക്രിക്കറ്റിൽ നിന്നും വിരമിച്ചതിന് ശേഷവും ധോണിയുടെ ആരാധക പിന്തുണയ്‌ക്ക് മങ്ങലേറ്റിട്ടില്ല എന്ന് തെളിയിക്കുന്നതാണ് ഈ ചിത്രങ്ങളെന്ന് ആരാധകർ ചൂണ്ടിക്കാട്ടുന്നു. ഐപിഎൽ 2023 സീസണിന് വേണ്ടി തയ്യാറെടുപ്പ് നടത്തുന്ന ധോണിയുടെ ചിത്രം അടുത്തയിടെ പുറത്ത് വന്നിരുന്നു.
അതേസമയം, ഖത്തർ ലോകകപ്പിൽ ജയത്തോടെ അരങ്ങേറിയ ബ്രസീലിന് കനത്ത തിരിച്ചടിയാവുകയാണ് സൂപ്പർ താരം നെയ്മറുടെ പരിക്ക്. കഴിഞ്ഞ ദിവസം സെർബിയക്കെതിരെ നടന്ന മത്സരത്തിനിടെ കാൽക്കുഴയ്‌ക്കേറ്റ പരിക്കാണ് നെയ്മർക്ക് വിനയായത്. ഇതോടെ, സ്വിറ്റ്സർലൻഡിനെതിരായ അടുത്ത മത്സരം നെയ്മർക്ക് നഷ്ടമാകും.
