ദോഹ: ഖത്തർ ലോകകപ്പിലെ ഗ്രൂപ്പ് ഡി മത്സരത്തിൽ ടുണീഷ്യക്കെതിരെ ഓസ്ട്രേലിയക്ക് ജയം. അൽ ജനൂബ് സ്റ്റേഡിയത്തിൽ നടന്ന മത്സരത്തിൽ ഏകപക്ഷീയമായ ഒരു ഗോളിനായിരുന്നു ഓസ്ട്രേലിയയുടെ വിജയം.
ഇരുപത്തിനാലാം മിനിറ്റിൽ ഡ്യൂക്ക് ആണ് ഓസ്ട്രേലിയയുടെ വിജയ ഗോൾ നേടിയത്. ഇടത് വിങ്ങിലൂടെയുള്ള ഓസ്ട്രേലിയൻ ആക്രമണത്തിനൊടുവിൽ പന്ത് വലയിലെത്തിക്കാൻ പാകത്തിന് ഗുഡ്വിന്റെ കാലിലേക്കെത്തി. ഇടതുവശത്ത് നിന്നും ലഭിച്ച ക്രോസ് ഗുഡ്വിൻ ഗോൾ വല ലക്ഷ്യമാക്കി തൊടുത്തുവെങ്കിലും, ടുണീഷ്യൻ ഡിഫൻഡറുടെ കാലിൽ തട്ടി ഡ്യൂക്കിലേക്കെത്തി. ഹെഡ്ഡറിലൂടെ ഡ്യൂക്ക് അത് ഗോളാക്കി മാറ്റുകയായിരുന്നു.
ഗോൾ മടക്കാൻ ടുണീഷ്യ നടത്തിയ ശ്രമങ്ങൾ ഒന്നൊന്നായി വിഫലമാക്കാൻ ഓസീസ് പ്രതിരോധത്തിന് സാധിച്ചു. ലീഡ് ഉയർത്താനുള്ള ഓസ്ട്രേലിയയുടെ ശ്രമങ്ങളും വിജയത്തിലെത്തിയില്ല.
ആദ്യ മത്സരത്തിൽ നിലവിലെ ചാമ്പ്യന്മാരായ ഫ്രാൻസിനോട് 1-4ന് തോറ്റതിന് ശേഷമുള്ള ഓസ്ട്രേലിയയുടെ തിരിച്ചു വരവായിരുന്നു ഇന്നത്തെ വിജയം. തങ്ങളുടെ ആദ്യ മത്സരത്തിൽ ടുണീഷ്യ ഡെന്മാർക്കുമായി ഗോൾ രഹിത സമനില പാലിച്ചിരുന്നു.
Comments