ബാഹുബലി എന്ന ചിത്രത്തിലൂടെ മലയാളികൾക്കും പ്രിയപ്പെട്ടതായി മാറിയ നടനാണ് പ്രഭാസ്. ഇന്ത്യ മുഴുവനും നിരവധി ആരാധകരാണ് നടനുള്ളത്. അവിവാഹിതനായി തുടരുന്ന പ്രഭാസിനെക്കുറിച്ച് പലതവണ ഗോസിപ്പുകൾ ഉയർന്നിട്ടുണ്ട്. ഏറ്റവും ഒടുവിലായി പുറത്തുവന്ന ഗോസിപ്പ് നടി കൃതി സനോനുമായിട്ടുള്ളതാണ്.
ആദിപുരുഷ് എന്ന ചിത്രത്തിലായിരുന്നു ഇരുവരും ഒന്നിച്ച് അഭിനയിച്ചത്. അന്നുമുതൽ ഗോസിപ്പുകളും ആരംഭിച്ചിരുന്നു. ഇരുവരും പ്രണയത്തിലാണെന്നും ഡേറ്റിങ്ങിലാണെന്നും വാർത്തകൾ വരാൻ തുടങ്ങി. ഗോസിപ്പുകൾ പരിധി വിട്ടതോടെ നടി കൃതി തന്നെ വിശദീകരണവുമായി എത്തിയിരിക്കുകയാണ്.
ഇൻസ്റ്റഗ്രാം സ്റ്റോറിയിലൂടെയാണ് നടി തന്റെ നിലപാട് വ്യക്തമാക്കിയത്. യാതൊരു അടിസ്ഥാനവുമില്ലാത്ത ഗോസിപ്പുകളാണ് പരക്കുന്നതെന്ന് കൃതി പ്രതികരിച്ചു.
”ഇത് പ്രണയവുമല്ല, പിആർ വർക്കുമല്ല. ബെഡിയ ചിത്രത്തിന്റെ പ്രമോഷനുമായി ബന്ധപ്പെട്ട് റിയാലിറ്റി ഷോയിലെത്തിയപ്പോൾ വരുൺ ധവാൻ തമാശയ്ക്കായി പറഞ്ഞ കാര്യങ്ങളാണ് ഇത്ര വലിയ ഗോസിപ്പായി മാറിയത്. അടുത്തതായി ഏതെങ്കിലും പോർട്ടലിൽ വിവാഹ തീയതി കൂടി പ്രഖ്യാപിക്കുന്നതിന് മുമ്പ് ഇക്കാര്യം വ്യക്തമാക്കുകയാണ്. പ്രചരിക്കുന്ന ഗോസിപ്പുകളെല്ലാം അടിസ്ഥാന രഹിതമാണ്. ” കൃതി ഇൻസ്റ്റഗ്രാം സ്റ്റോറിയിലൂടെ പറഞ്ഞു.
റിയാലിറ്റി ഷോയിൽ വരുൺ ധവാനും കൃതിയും എത്തിയപ്പോൾ കരൺ ജോഹർ ചോദിച്ച ഒരു ചോദ്യത്തിന് നൽകിയ മറുപടിയാണ് ഗോസിപ്പുകൾക്ക് ആക്കം കൂട്ടിയത്. ബോളിവുഡിലെ മിടുക്കികളും അവിവാഹിതരുമായ നടിമാർ ആരൊക്കെയാണെന്ന് വരുണിനോട് ചോദിച്ചു. പലരുടെയും പേരുകൾ നടൻ പറഞ്ഞുവെങ്കിലും കൃതിയുടെ പേര് പറഞ്ഞില്ല. കൃതിയെ ഒഴിവാക്കിയത് എന്തുകൊണ്ടാണെന്ന് കരൺ ചോദിച്ചപ്പോൾ, ‘കൃതിയുടെ പേര് ഈ ലിസ്റ്റിൽ ഇല്ല. കാരണം അവളുടെ ഹൃദയത്തിൽ ഒരാളുണ്ട്. അയാൾ ദീപികയുടെ കൂടെ ഇപ്പോൾ മുംബൈയിൽ അഭിനയിക്കുകയാണ്’ എന്ന് വരുൺ പറഞ്ഞു. ഇതോടെ കൃതിയും പ്രഭാസും തമ്മിൽ പ്രണയത്തിലാണെന്ന് ആരാധകർ ഉറപ്പിക്കുകയും ചെയ്തു. ഈ സാഹചര്യത്തിലാണ് നിലപാട് വ്യക്തമാക്കി കൃതി സനോൻ എത്തിയത്.
