വളരെ ചുരുങ്ങിയ കാലം കൊണ്ട് യുവാക്കളുടെ ഹരമായി മാറിയ സോഷ്യൽ മീഡിയ പ്ലാറ്റ്ഫോമാണ് ഇൻസ്റ്റഗ്രാം. ഫേസ്ബുക്ക് ഉപയോഗിക്കാത്ത പലരും ഇൻസ്റ്റഗ്രാമിന്റെ ആരാധകരാണെന്നതാണ് യാഥാർത്ഥ്യം. വിശദമായ കുറിപ്പുകളും എഴുത്തുകളും നമുക്ക് ഇൻസ്റ്റഗ്രാമിൽ കാണാൻ സാധിക്കില്ല. മറിച്ച് ഫോട്ടോകളും വീഡിയോകളുമാണ് ഇൻസ്റ്റഗ്രാമിന്റെ പ്രത്യേകത.
ഒന്നിലധികം ഫോട്ടോകൾ അപ്ലോഡ് ചെയ്യാനുണ്ടെങ്കിലും വീഡിയോകളും റീൽസും തയ്യാറാക്കണമെങ്കിലും ഫേസ്ബുക്കിനേക്കാൾ ഇൻസ്റ്റഗ്രാമിനെ കൂടുതൽ പേരും ആശ്രയിക്കുന്നു. കാരണം ഇൻസ്റ്റഗ്രാം വായനയുടെ ലോകമല്ല, മറിച്ച് കാഴ്ചകളുടെ ലോകമാണെന്ന് പറയാം. ഫേസ്ബുക്കിൽ ഇഷ്ടപ്പെട്ട ഒരു ഫോട്ടോ കണ്ടാൽ അത് സേവ് ചെയ്യാൻ പ്രയാസമില്ല. എന്നാൽ ഇത്രമാത്രാം ഫോട്ടോകളും വീഡിയോകളും എത്തുന്ന ഇൻസ്റ്റഗ്രാമിൽ നിന്നും ഇഷ്ടപ്പെട്ടത് ഡൗൺലോഡ് ചെയ്യാൻ ഇത്തിരി പാടാണ്. കാരണം ഫോട്ടോയ്ക്ക് ഒപ്പം നൽകുന്ന ഓപ്ഷനിൽ സേവ് അഥവാ ഡൗൺലോഡ് എന്ന ഓപ്ഷൻ ഇൻസ്റ്റഗ്രാം നൽകുന്നില്ല. പണി കുറെ ചെയ്തിട്ട് വേണം ഇൻസ്റ്റയിലെ ഒരു ഫോട്ടോയോ വീഡിയോയോ ഡൗൺലോഡ് ചെയ്യാൻ.
എന്നാൽ ഇനി അക്കാര്യം സിംപിളാണ്. വളരെ എളുപ്പത്തിൽ ഇൻസ്റ്റഗ്രാമിൽ നിന്നും ഫോട്ടോകളും വീഡിയോകളും നമ്മുടെ മൊബൈലിലേക്ക് സേവ് ചെയ്യാം. ഇതിനായുള്ള സൂത്രപണി ഒളിഞ്ഞിരിക്കുന്നത് ടെലഗ്രാമിലാണ്.
നമ്മളിൽ ഭൂരിഭാഗം ആൾക്കാരും ഉപയോഗിക്കുന്ന ആപ്ലിക്കേഷനാണ് ടെലഗ്രാം. ഇതുവഴി ഇൻസ്റ്റയിൽ നിന്നും ആവശ്യമായ ഫോട്ടോകളും വീഡിയോകളും ഡൗൺലോഡ് ചെയ്യാം. ചെയ്യേണ്ടത് ഇത്രമാത്രം..
ടെലഗ്രാം തുറക്കുക. അതിലെ സർച്ച് ബട്ടണിൽ ക്ലിക്ക് ചെയ്ത് ഇൻസ്റ്റഗ്രാം സേവർ എന്ന ചാറ്റ് ബോട്ട് തിരഞ്ഞെടുക്കുക. അതിൽ നിങ്ങൾക്ക് ഡൗൺലോഡ് ചെയ്ത് കിട്ടേണ്ട ഫോട്ടോ/ വീഡിയോ എന്നിവയുടെ യുആർഎൽ അഥവാ ലിങ്ക് പേസ്റ്റ് ചെയ്യുക. ചാറ്റ് ബോട്ടിലൂടെ റിപ്ലൈ ആയി നമുക്ക് ആവശ്യമായ ഫോട്ടോ ലഭിക്കും. അല്ലെങ്കിൽ വീഡിയോ കിട്ടുന്നതാണ്. ഒപ്പം ഇൻസ്റ്റഗ്രാം പോസ്റ്റിന് കൂടെ നൽകിയിരിക്കുന്ന അടിക്കുറിപ്പും ചാറ്റ് ബോട്ടിൽ കാണിക്കുന്നതാണ്.
എന്നാൽ ഈ ഫീച്ചറിന് ഒരു പോരായ്മയുണ്ട്. പ്രൈവറ്റായി സെറ്റ് ചെയ്തിട്ടുള്ള ഇൻസ്റ്റഗ്രാം അക്കൗണ്ടിൽ നിന്നും പോസ്റ്റ് ചെയ്യപ്പെടുന്ന ഫോട്ടോകളും വീഡിയോകളും ഇത്തരത്തിൽ ഡൗൺലോഡ് ചെയ്യാൻ സാധിക്കില്ല. മാത്രവുമല്ല, ഇൻസ്റ്റഗ്രാം സ്റ്റോറികൾ സേവ് ചെയ്യാൻ ടെലഗ്രാമിലെ പ്രസ്തുത ചാറ്റ് ബോട്ട് പ്രീമിയം ആക്കി മാറ്റണം. ഇതിനായി പ്രതിമാസം 2.99 ഡോളറാണ് ചിലവ്. പൈസ മുടക്കിയാൽ ഇൻസ്റ്റ സ്റ്റോറികളും സ്വന്തമാക്കാമെന്ന് ഇൻസ്റ്റഗ്രാം സേവർ എന്ന ചാറ്റ് ബോട്ട് വ്യക്തമാക്കുന്നു.
