ചെന്നൈ: ജല്ലിക്കെട്ടിനിടെ കാളയുടെ കുത്തേറ്റ് 14 വയസ്സുകാരൻ മരിച്ചു. തമിഴ്നാട്ടിലെ ധർമ്മപുരിയിൽ നടന്ന ജെല്ലിക്കെട്ടിനിടെയാണ് ദാരുണമായ സംഭവം. തടങ്ങം ഗ്രാമത്തിലാണ് പരിപാടി നടന്നത്.
ഗോകുൽ എന്ന കുട്ടിയാണ് കാളയുടെ കുത്തേറ്റ് മരിച്ചത്. ജെല്ലിക്കെട്ട് നടക്കുമ്പോൾ നിയന്ത്രണം വിട്ട കാള ഗോകുലിന് നേരെ ഓടിയടുക്കുകയായിരുന്നു. ഗോകുലിന്റെ വയറ്റിലാണ് കാള കുത്തിയത്. സാരമായി പരിക്കേറ്റ കുട്ടിയെ ഉടൻ ആശുപത്രിയിലും പ്രവേശിപ്പിച്ചിരുന്നു.
ധർമ്മപുരിയിലെ സർക്കാർ ആശുപത്രിയിൽ പ്രവേശിപ്പിച്ചുവെങ്കിലും ഗോകുൽ മരിച്ചു. കുട്ടിക്ക് പരിക്കേറ്റത് എങ്ങനെയെന്ന് കണ്ടെത്താൻ ജെല്ലിക്കെട്ടിന്റെ ദൃശ്യങ്ങൾ പോലീസ് പരിശോധിച്ച് വരികയാണ്. ജല്ലിക്കെട്ടുമായി ബന്ധപ്പെട്ട് ഈ വർഷം മരിക്കുന്ന നാലാമത്തെ ആളാണ് ഗോകുൽ.
