ഗാന്ധിനഗർ: വൻ മയക്കുമരുന്ന് ശേഖരവുമായി ഇറാനിയൻ ബോട്ട് പിടിയിൽ. ഗുജറാത്ത് തീരത്തിന് സമീപത്ത് നിന്നുമാണ് 425 കോടി വിലമതിയ്ക്കുന്ന 61 കിലോഗ്രാം ഹെറോയിനുമായി ആറ് ഇറാനിയൻ പൗരന്മാരെ ഇന്ത്യൻ കോസ്റ്റ് ഗാർഡ് പിടികൂടിയത്. എടിഎസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ തിരച്ചിലിൽ ബോട്ട് കണ്ടെത്തുകയായിരുന്നു.
ഇറാനിയൻ ബോട്ടിൽ മയക്കുമരുന്ന് കടത്തുന്നതായി എടിഎസിന് രഹസ്യവിവരം ലഭിക്കുകയായിരുന്നു. തുടർന്ന് കോസ്റ്റ് ഗാർഡിന് വിവരം കൈമാറി. പിന്നാലെ ഐസിജിഎസ് മീര ബെൻ, ഐസിജിഎസ് അഭീക് എന്നീ ഫാസ്റ്റ് പട്രോൾ ക്ലാസ് കപ്പലുകളിൽ കോസ്റ്റ് ഗാർഡ് തിരച്ചിൽ ആരംഭിച്ചു. സേനയുടെ കപ്പൽ കണ്ടതിനെ തുടർന്ന് ബോട്ട് ഗതിമാറി സഞ്ചരിച്ചെങ്കിലും പിന്തുടർന്ന് പിടികൂടുകയായിരുന്നു. വിശദ അന്വേഷണത്തിനായി പ്രതികളെ ഓഖയിൽ എത്തിച്ചു.
ഇന്ത്യൻ കോസ്റ്റ് ഗാർഡിന്റെയും എടിഎസിന്റെയും സംയുക്ത ഓപ്പറേഷനുകളിലൂടെ ഇതുവരെ 2,355 കോടി രൂപയുടെ 407 കിലോഗ്രാം മയക്കുമരുന്നാണ് ഇന്ത്യൻ തീരത്ത് നിന്നും പിടികൂടിയത്.
Comments