ആലപ്പുഴ : അമ്പലപ്പുഴ ക്ഷേത്രത്തിൽ ഉത്സവത്തിന് തുടക്കം. ഭക്തിസാന്ദ്രമായ അന്തരീക്ഷത്തിൽ ശ്രീകൃഷ്ണ ക്ഷേത്രത്തിലെ 10 ദിവസത്തെ ഉത്സവത്തിന് കൊടിയേറി. കടിയാക്കോൽ വാസുദേവൻ നമ്പൂതിരിയാണ് കൊടിയേറ്റിയത്. ഈ മാസം 17-നാണ് നാടകശാല സദ്യ. 18-ന് ആറാട്ടോടെ ഉത്സവം സമാപിക്കും. വൈകിട്ട് ദീപാരാധനയ്ക്ക് മുൻപായി ക്ഷേത്രത്തിന്റെ എട്ട് ദിക്കുകളിലും ഇല്ലിക്കമ്പ് നാട്ടി ദിക്ക് കൊടിയേറ്റ് കർമ്മം നടന്നു.
നാളെമുതൽ ഉത്സവത്തിന്റെ ഒമ്പതാം ദിനം വരെ കുളത്തിൽ വേലയും തിരുമുൻപിൽവേലയും നടക്കും. കൊടിമരത്തിന് തെക്കുഭാഗത്തുള്ള പ്രത്യേക തട്ടുപന്തലിനു മുന്നിൽ കോയ്മസ്ഥാനിയുടെ സാന്നിധ്യത്തിൽ വേലത്തകിൽ കൊട്ടി. രാജപ്രതിനിധി തെക്കേടത്ത് നാരായണ ഭട്ടതിരി, കോയ്മസ്ഥാനി ശ്രീകുമാർ വലിയമഠം, അസി. കമ്മീഷണർ ജെ ആശാകുമാരി തുടങ്ങി നിരവധി പേർ ചടങ്ങിൽ പങ്കെടുത്തു.
ഉത്സവബലി ദർശനം നടക്കുന്നതിനാൽ മൂന്നാം ഉത്സവമായ നാളെ മുതൽ ഒമ്പതാം ഉത്സവം വരെ രാവിലെ 8.30-നാണ് അമ്പലപ്പുഴ പാൽപ്പായസം വിതരണം ചെയ്യുക. നിശ്ചിത അളവിൽ മാത്രം പായസം തയാറാക്കുന്നതിനാൽ ബുക്കിംഗ് ഇല്ല എന്നും ക്ഷേത്ര ഭാരവാഹികൾ അറിയിച്ചു.
