വലിയ പ്രതീക്ഷകളോടെയാണ് നാം വാഴ കൃഷി തുടങ്ങുന്നത്. ചിലരെങ്കിലും വാഴ കൃഷിയിൽ തുടക്കമാവും. ആദ്യമൊക്കെ നല്ല വിളവ് ലഭിക്കുമെന്ന് തോന്നുവെങ്കിലും നമ്മുടെ പ്രതീക്ഷകൾ തകിടം മറിയാറുണ്ട്. നിരവധി പേരാണ് വാഴ കൃഷി ചെയ്യുന്നത്. എന്നാൽ അവർക്കെല്ലാം വിചാരിക്കുന്ന വരുമാനം കിട്ടാറില്ല എന്നതാണ് സത്യം. എന്താണ് അതിന്റെ കാരണം. നല്ല ഇനം വിത്തുകൾ കിട്ടാത്തതും മോശമായ കാലവസ്ഥയുമൊക്കെ തന്നെയാണ് വാഴ കൃഷിയിൽ വരുമാനം കുറയാനുള്ള കാരണങ്ങൾ. നല്ല ഇനം വേഗത്തിൽ കായ്ക്കുന്നതുമായ വാഴ വിത്തുകൾ കൃഷി ചെയ്യുന്നത് വരുമാനമുണ്ടാക്കാൻ സഹായിക്കും.
നല്ല വളക്കൂറും നനവുമുള്ള മണ്ണിലാണ് വാഴ കൃഷി ചെയ്യേണ്ടത്. മഴയെ ആശ്രയിച്ചാണ് കൃഷി ചെയ്യുന്നതെങ്കിൽ ഏപ്രിൽ- മെയ് മാസങ്ങങ്ങളാണ് അനുയോജ്യം. ജലസേചനം നടത്തിയാണ് എങ്കിൽ ഓഗസ്റ്റ് – സെപ്റ്റംബർ മാസങ്ങളിലും വാഴ നടാം. പ്രാദേശികമായ കാലാവസ്ഥ വ്യതിയാനങ്ങൾക്കനുസരിച്ച് നടീൽ സമയം മാറ്റാവുന്നതുമാണ്. നടുന്ന സമയത്ത് അതിയായ മഴയോ വെയിലോ നല്ലതല്ല. 50 സെന്റീമീറ്റർ നീളവും ആഴവും വീതിയുമുള്ള കുഴികളിലാണ് സാധാരണയായി വാഴ നടുന്നത്. കുഴികൾ തമ്മിൽ രണ്ടു മീറ്റർ അകലം പാലിക്കണം. രോഗങ്ങളില്ലാത്ത ആരോഗ്യമുള്ള സൂചികന്നുകൾ തിരഞ്ഞെടുക്കണം.
ഒരു കുഴിയിൽ 500 ഗ്രാം കുമ്മായം ചേർക്കാം. അടുത്ത ദിവസം ഒരു കുഴിയിൽ 10 കിലോ ജൈവവളം ചേർക്കണം. ഈ കുഴിയിലേക്ക് വാഴക്കന്നുകൾ നടാം. കൃത്യമായ നിരീക്ഷണമുണ്ടെങ്കിൽ ജൈവനിയന്ത്രണ മാർഗ്ഗത്തിൽ തന്നെ ഒട്ടുമിക്ക രോഗങ്ങളെയും കീടങ്ങളെയും നിയന്ത്രിക്കാനാകും. ഒപ്പം കൃഷിയിടം വൃത്തിയായി സൂക്ഷിക്കാനും ശ്രദ്ധിക്കണം. വളപ്രയോഗത്തിലും കീടനീയന്ത്രണത്തിലുമൊക്കെ വിപണി താൽപര്യം പരിഗണിക്കണം. പാളയൻകോടൻ പഴം വാങ്ങാൻ ആളുകൾക്കു താൽപര്യം കുറയുന്നതായി കണ്ടാൽ ഞാലിപ്പൂവനിലേക്കോ മറ്റിനങ്ങളിലേക്കോ മാറാൻ കഴിയണം. എങ്കിൽ മാത്രമാണ് ഒരു കർഷകന് വിജയിക്കാൻ സാധിക്കുക.
ഏതെങ്കിലും ഒരു സീസണിനെ മാത്രം ആശ്രയിക്കുന്ന രീതി അവസാനിപ്പിക്കുകയും വിപണി നോക്കി ഉൽപാദനം ക്രമീകരിക്കുകയും ചെയ്താൽ മാത്രമേ വാഴ ആദായകരമാവൂ. 12 മാസവും വിളവു ലഭിക്കുന്ന വിധത്തിൽ പല ബാച്ചായി കൃഷി ക്രമീകരിക്കണം. പല ബാച്ചായി ചെയ്യുമ്പോൾ വർഷം മുഴുവൻ വരുമാനം ലഭിക്കും. കാലാവസ്ഥാമാറ്റത്തിന്റെ കാലഘട്ടത്തിൽ ഏതെങ്കിലും ഒരു ബാച്ചിനു നാശമുണ്ടായാലും നഷ്ടം താരതമ്യേന കുറയും. തൊട്ടുപിന്നാലെ അടുത്ത ബാച്ച് വിളവെടുപ്പിനു പാകമാകുന്നതിനാൽ അടുത്ത വരുമാനം വൈകില്ല.
