തിരുവനന്തപുരം: നെയ്യാറിന്റെ സംരക്ഷണത്തിനായി ഒറ്റയാൾ പോരാട്ടം നടത്തിയ ഡാളി അമ്മുമ്മ (85) നിര്യാതയായി. തിരുവനന്തപുരം ജില്ലാ പഞ്ചായത്തിന്റെ അണ്ടൂർകോണം കെയർ ഹോമിൽ വെച്ചായിരുന്നു അന്ത്യം.
നെയ്യാറ്റിൻകര ഓലത്താനി സ്വദേശി ഡാളി നെയ്യാറിലെ മണൽമാഫിയയ്ക്കെതിരെ ഒറ്റയാൾ പോരാട്ടം നടത്തിയതോടെയാണ് ശ്രദ്ധേയയാകുന്നത്. മണൽ ഖനനം കാരണം ആകെയുണ്ടായിരുന്നു കിടപ്പാടവും നഷ്ടമായതിനെ തുടർന്ന് പ്രത്യക്ഷ സമരത്തിനിറങ്ങുകയായിരുന്നു. ഇതുമായി ബന്ധപ്പെട്ട് നിരവധി കേസുകൾ ഡാളിയുടെ പേരിൽ നെയ്യാറ്റിൻകര കോടതിയിൽ നിലവിലുണ്ട്.
കിടപ്പാടം നഷ്ടമായതിനെ തുടർന്ന് ബന്ധുവീട്ടിലായിരുന്നു ഡാളി കഴിഞ്ഞിരുന്നത്. ബന്ധുവിനും സുഖമില്ലാതായതോടെ നാട്ടുകാർ ചേർന്ന് അഗതി മന്ദിരത്തിലാക്കി. രണ്ട് വർഷമായി അണ്ടൂർകോണം കെയർ ഹോമിലായിരുന്നു താമസം.
Comments