ബ്രഹ്മപുരം തീപിടുത്തം പ്രമേയമാക്കി കലാഭവൻ ഷാജോണ് നായകനാകുന്ന പുതിയ ചിത്രമാണ് ‘ഇതുവരെ’. ദേശീയ ചലചിത്ര അവാർഡ് ജേതാവായ അനില് തോമസാണ് ചിത്രത്തിന്റെ തിരക്കഥയും സംവിധാനവും നിർവഹിക്കുന്നത്. ബ്രഹ്മപുരം മാലിന്യ പ്ലാന്റിന്റെ പശ്ചാത്തലത്തിലുള്ള ചിത്രത്തിന്റെ ഫസ്റ്റ് ലുക്ക് പുറത്തുവിട്ടു.
മാലിന്യ സംസ്കരണ പ്ലാന്റിലുണ്ടായ തീപിടിത്തവും, പ്ലാന്റിനോട് ചേർന്ന് ജീവിക്കുന്ന കുടുംബത്തിലുണ്ടാകുന്ന ആരോഗ്യപ്രശ്നങ്ങളുമാണ് ചിത്രം പ്രേർക്ഷകർക്ക് മുന്നിലേക്കെത്തിക്കുന്നത്. ബ്രഹ്മപുരം മാലിന്യ സംസ്കരണ പ്ലാന്റ് വിവാദം കെട്ടടങ്ങും മുന്നേ സംഭവത്തെ പറ്റിയുള്ള സിനിമ പൊതുസമൂഹത്തിൽ ചർച്ചയാവുകയാണ്. ബ്രഹ്മപുരം മാലിന്യ പ്ലാന്റില് തീപിടുത്തും ഉണ്ടാകുന്നതിന് മുന്നേ ആലോചിച്ച പ്രൊജക്റ്റാണ് ഇത്.
മാലിന്യ പ്ലാന്റിലെ തീപിടുത്തത്തിന്റെ തുടക്കം മുതൽ ഇതുവരെ നടന്ന സംഭവ വികാസങ്ങൾ ചിത്രത്തിൽ അനാവരണം ചെയ്യും. ദേശീയ അവാർഡ് അടക്കം നിരവധി പുരസ്കാരങ്ങൾ നേടിയ ‘മിന്നാമിനുങ്ങ്’ എന്ന ചിത്രത്തിന്റെ സംവിധായകനാണ് അനിൽ തോമസ്. ഈ സിനിമയുടെയും രചനയും സംവിധാനവും നിർവഹിക്കുന്നതും അനിൽ തന്നെയാണ്. ടൈറ്റസ് പീറ്ററാണ് ചിത്രത്തിന്റെ നിർമ്മാണം.
ബ്രഹ്മപുരത്തെ തീയും പുകയും ആരോഗ്യപ്രശ്നങ്ങൾക്ക് വഴിയൊരുക്കുമോ എന്നുളള ഭീതിയിലാണ് ബ്രഹ്മപുരത്തും പ്രദേശങ്ങളിലുമുള്ള ജീവിചതങ്ങൾ. ഇതിനിടയിൽ ഇറങ്ങുന്ന ചിത്രം തീപിടിത്തത്തിന്റെയും തുടർന്നുണ്ടായ പ്രശ്നങ്ങളെയും അഭിസംബോധന ചെയ്യുമെന്നുള്ള പ്രതീക്ഷയിലാണ് കേരളം.
പതിനഞ്ച് വർഷങ്ങൾക്ക് മുൻപ് സമൃദ്ധമായ കൃഷിയിടവും 100 ഓളം കുടുംബങ്ങളുടെ താമസസ്ഥലമായിരുന്നു ബ്രഹ്മപുരം. അവിടെ നിന്നും അവരെ കുടിയൊഴിപ്പിച്ച് മാലിന്യകൂമ്പാരമാക്കി മാറ്റി ഒരു വലിയ ദുരന്തത്തിന് കാത്തിരിക്കുകയായിരുന്നു നമ്മൾ എന്ന് സംവിധായകൻ അനിൽ തോമസ് പറഞ്ഞു. കടമ്പ്രയാറും ചിത്രപ്പുഴയും ഒഴുകുന്ന കൃഷിഭൂമിയാണിതെന്നും ഇത്തരത്തിൽ ഒരു സ്ഥലത്ത് വലിയ മാലിന്യകൂമ്പാരം സൃഷ്ടക്കിക്കുക എന്ന മലയാളിയുടെ കാഴ്ചപ്പാട് തന്നെ ചോദ്യം ചെയ്യപ്പെടേണ്ട വസ്തുതാണെന്നും അദ്ദേഹം കൂട്ടിച്ചേർത്തു.
Comments