ഇന്ത്യയിൽ ആദ്യ റീട്ടെയിൽ ഷോപ്പുകളുമായി ആപ്പിൾ. അടുത്തമാസത്തോടെ ഡൽഹിയിലും മുംബൈയിലും ഷോപ്പുകൾ ആരംഭിക്കുമെന്നാണ് റിപ്പോർട്ടുകൾ. 2020-ൽ ഇന്ത്യയിൽ ആരംഭിച്ച ആപ്പിളിന്റെ ഇ-സ്റ്റോർ വഴിയാണ് നിലവിൽ ഉപകരണങ്ങൾ വിറ്റഴിക്കുന്നത്. കമ്പനിയുടെ രണ്ട് ഓഫ്ലൈൻ ഷോപ്പുകൾ ഡൽഹിയിലും മുംബൈയിലും പ്രവർത്തിക്കുന്നുണ്ട്. എന്നാൽ പുറത്ത് വരുന്ന ഔദ്യോഗിക റിപ്പോർട്ടുകൾ പ്രകാരം ഏപ്രിലിൽ മുംബൈയിലും ഏപ്രിലിനും ജൂണിനും ഇടയിൽ ഡൽഹിയിലും റീട്ടെയിൽ ഷോപ്പുകൾ പ്രവർത്തനം ആരംഭിക്കും.
ആപ്പിളിന്റെ ആദ്യ സ്റ്റോർ മുംബൈയിലെ ജിയോ വേൾഡ് ഡ്രൈവ് മാളിലും രണ്ടാമത്തേത് ഡൽഹിയിലെ സെലക്ട് സിറ്റിവാക്ക് മാളിലും തുറക്കും. ഡൽഹിയിൽ ആരംഭിക്കാനിരിക്കുന്ന സ്റ്റോറിനെ അപേക്ഷിച്ച് മുംബൈയിലെ സ്റ്റോറാണ് വലുത്. അതേസമയം ആപ്പിളിന്റെ റീട്ടെയിൽ ആൻഡ് പീപ്പിൽ സീനിയർ വൈസ് പ്രസിഡന്റ് ഡെയ്ഡ്ര ഒബ്രിയൻ മുംബൈയിൽ നടക്കുന്ന സ്റ്റോർ ലോഞ്ച് ചടങ്ങിൽ പങ്കെടുക്കുവാൻ സാധ്യതയുണ്ട്. എന്നാൽ ആപ്പിൾ സിഇഒ ടിം കുക്ക് ചടങ്ങിൽ സന്നിഹിതനായിരിക്കുമോ എന്ന കാര്യത്തിൽ വ്യക്തതയില്ല.
വിവിധ പദ്ധതികളുടെ ഭാഗമായി കുക്ക് ഒന്നിലധികം തവണ ഇന്ത്യ സന്ദർശിച്ചിരുന്നു. കൂടാതെ 2016-ലെ സന്ദർശന വേളയിൽ അദ്ദേഹം പ്രധാനമന്ത്രി നരേന്ദ്ര മോദിയുമായും കൂടിക്കാഴ്ച നടത്തിയിരുന്നു. ഇന്ത്യ ആപ്പിളിന്റെ പുരോഗതിയിൽ നിർണായക വേദിയായി മാറുകയാണ്. ആപ്പിളിന്റെ ത്രൈമാസ വരുമാന റിപ്പോർട്ടിൽ ഇന്ത്യയ്ക്കായി പ്രത്യേക വിഭാഗമുണ്ടെന്ന് റിപ്പോർട്ടുകൾ സൂചിപ്പിക്കുന്നു.
