കോഴിക്കോട്: ഓടിക്കൊണ്ടിരിക്കുന്ന ട്രെയിനിൽ സഹയാത്രികരുടെ ശരീരത്ത് പെട്രോൾ ഒഴിച്ച് തീകൊളുത്തിയ സംഭവം നടന്ന എലത്തൂരിലെ റെയിൽവേ ട്രാക്ക് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻസന്ദർശിക്കും. തിങ്കളാഴ്ച രാവിലെ 10 മണിയ്‌ക്കാകും അദ്ദേഹം സന്ദർശനം നടത്തുക. ഇന്നലെ രാത്രി 9.30-ഓടെയാണ് ആലപ്പുഴ-കണ്ണൂർ എക്‌സിക്യൂട്ടിവിൽ കേട്ടുകേൾവി ഇല്ലാത്ത സംഭവം നടന്നത്.
ഡി2 കോച്ചിൽ നിന്ന് ഡി1 കോച്ചിലേക്ക് രണ്ട് കുപ്പി പെട്രോളുമായാണ് അക്രമിയെത്തിയത്. തിരക്ക് കുറവായിരുന്ന കോച്ചിൽ പല സീറ്റുകളിലായാണ് യാത്രക്കാർ ഇരുന്നിരുന്നത്. തുടർന്ന് എല്ലാവരുടെയും ദേഹത്തേക്ക് അക്രമി പെട്രോൾ ചീറ്റിക്കുകയായിരുന്നു. ഇതിന് പിന്നാലെ യാതൊരു പ്രകോപനവുമില്ലാതെ ഇയാൾ തീയിടുകയായിരുന്നു. പിന്നാലെ ഓടി രക്ഷപ്പെടുകയായിരുന്നു.
സംഭവം ആസൂത്രിതമെന്നാണ് പോലീസിന്റെ പ്രാഥമികവിവരം. സംഭവത്തിന് ശേഷം ഒരാൾ ബൈക്കിൽ കയറി രക്ഷപ്പെടുന്നതിന്റെ ദൃശ്യങ്ങൾ പോലീസിന് ലഭിച്ചിട്ടുണ്ട്. അക്രമം നടത്തിയത് ടിക്കറ്റ് റിസർവ് ചെയ്ത് വന്നയാളല്ലയെന്ന് ടിടിആർ പോലീസിന് മൊഴി നൽകിയിട്ടുണ്ട്. സംഭവത്തിൽ ഭീകരവാദ സാധ്യതയും പോലീസ് തള്ളി കളയുന്നില്ല. ആക്രമണത്തിൽ കേന്ദ്ര ആഭ്യന്തര മന്ത്രാലയം സ്ഥിതിഗതികൾ വിലയിരുത്തുന്നതായാണ് വിവരം.
