ഡെറാഡൂൺ: ചാർധാം യാത്രയ്ക്ക് മുന്നോടിയായി ചുവരുകളിൽ മഹാവിഷ്ണുവിന്റെ ചിത്രങ്ങൾ വരയ്ക്കാൻ ഗോവയിൽ നിന്നുള്ള പ്രത്യേക സംഘം. ബദരീനാഥ് ധാമിന് ചുറ്റുമുള്ള ചുവരുകളിൽ ചിത്രങ്ങൾ വരയ്ക്കുന്നതിനായാണ് പ്രത്യേക സംഘം ഉത്തരാഖണ്ഡിൽ എത്തിയിരിക്കുന്നത്. ഗോവ സാസ്കാരിക വകുപ്പുമായി ചേർന്നാണ് ഉത്തരാഖണ്ഡ് സർക്കാർ ചാർധാമിലെ ചുവരുകളെ മോടിപിടിപ്പാക്കാനൊരുങ്ങുന്നത്.
ഗോവ കോളേജ് ഓഫ് ആർട്സിൽ നിന്നുള്ള വിദ്യാർതിഥികളും അദ്ധ്യാപകരും മറ്റ് സ്റ്റാഫ് അംഗങ്ങളുമാണ് ഇവിടെ എത്തിയിരിക്കുന്നത്. മഹാവിഷ്ണുവിന്റെ വ്യത്യസ്ത ഭാവങ്ങളിലുള്ള ചിത്രങ്ങൾ സംഘം വരയ്ക്കും. ചിത്രങ്ങൾ ക്യാൻവാസിൽ പൂർത്തീകരിച്ച ശേഷമാവും ബദ്രിവിശാൽ ധാമിന് ചുറ്റുമുള്ള ചുവരുകളിൽ സ്ഥാപിക്കുക. പദ്ധതി പൂർത്തീകരിക്കുന്നതിനായി ഏകദേശം 10-11 ദിവസമെടുക്കുമെന്ന് ഗോവ സാംസ്കാരിക വകുപ്പ് അറിയിച്ചു.
13 വിദ്യാർത്ഥികളും ഒരു പ്രൊഫസറും രണ്ട് സ്റ്റാഫും ദൗത്യത്തിന് ഒപ്പമുണ്ടാകും. കലാ-സാസ്കാരിക വകുപ്പിൽ നിന്ന് കത്ത് ലഭിച്ചിരുന്നുവെന്ന് ഗോവ കോളേജ് ഓഫ് ആർട്ട് പ്രൊഫസർ ഗോപാൽ പുദാസ്കർ പറഞ്ഞു. കത്ത് ലഭിച്ചതിന് പിന്നാലെയാണ് വിദ്യാർത്ഥികളും അദ്ധ്യാപകരും പദ്ധതിയുടെ ഭാഗമായി ഇവിടെയെത്തിയത്. മഹാവിഷ്ണുവിന്റെ ചിത്രങ്ങൾ ചുവരുകളിൽ സൃഷ്ടിയ്ക്കുക എന്നതായിരുന്നു ഉത്തരവാദിത്തം. എന്നാൽ ചുവരുകൾ പൂർണ്ണമായും ഒരുക്കാത്തതിനാൽ തന്നെ ആർട്ട് വർക്കുകൾ ചെയ്യുന്നത് വെല്ലുവിളിയായിരുന്നു. നാളെ മുതൽ ജോലി ആരംഭിക്കുമെന്നും അദ്ദേഹം പറഞ്ഞു.
