ഹൈദരാബാദ്: ലോകത്തിലെ ആദ്യത്തെ 3-ഡി പ്രിന്റഡ് ക്ഷേത്രം തെലങ്കാനയിൽ വരുന്നു. ഹൈദരാബാദ് ആസ്ഥാനമായി പ്രവർത്തിക്കുന്ന നിർമാണ കമ്പനി അപ്സൂജ ഇൻഫ്രാടെക്കും സിംപ്ലിഫോർജ് ക്രിയേഷൻസും ചേർന്നാണ് അപൂർവ്വമായ രീതിയിൽ ക്ഷേത്രം പണികഴിപ്പിക്കുന്നത്.
3,800 ചതുരശ്ര അടി വിസ്തീർണത്തിൽ 30 അടി ഉയരത്തിൽ സിദ്ദിപേട്ട് ജില്ലയിലെ ബുരുഗുപള്ളിയിലാണ് ക്ഷേത്രത്തിന്റെ നിർമാണം. സംസ്ഥാനത്തിന്റെ രൂപീകരണ ദിനമായ ജൂൺ 2-നോട് അനുബന്ധിച്ചാണ് ഇതുസംബന്ധിച്ച ഔദ്യോഗിക പ്രഖ്യാപനം ഇപ്പോഴുണ്ടായത്. തദ്ദേശീയമായി വികസിപ്പിച്ച സോഫ്റ്റ്വെയറുകളും മെറ്റീരിയലുകളും ഉപയോഗിച്ചാണ് ക്ഷേത്രത്തിന്റെ പണി പൂർത്തീകരിക്കുകയെന്ന് അധികൃതർ അറിയിച്ചു.
ക്ഷേത്രത്തിൽ മൂന്ന് ശ്രീകോവിലുകളാണ് ഉണ്ടാവുക. വിഘ്നേശ്വരന് സമർപ്പിക്കുന്ന രീതിയിൽ മോദകത്തിന്റെ ആകൃതിയിലായിരിക്കും ഇത് രൂപീകരിക്കുക. ശ്രീപരമേശ്വരനും പാർവതീ ദേവിക്കും പ്രത്യേകം സ്ഥാനങ്ങളും പണി കഴിപ്പിക്കും. താമരയുടെ ആകൃതിയിലുള്ള ഗോപുരമാണ് പാർവതീദേവിക്ക് വേണ്ടി തയ്യാറാക്കുന്നത്. നിലവിൽ ക്ഷേത്രത്തിന്റെ നിർമാണം രണ്ടാം ഘട്ടത്തിലെത്തി നിൽക്കുകയാണെന്ന് അപ്സൂജ ഇൻഫ്രാടെക് എംഡി ഹരികൃഷ്ണ ജീദിപല്ലി അറിയിച്ചു.
Comments